Kryetari i Komunës së Sarajit, Muhamed Elmazi, ka reaguar pas publikimit të një videoje që tregon një zënkë të ashpër mes dy grupeve të nxënësve në shkollën fillore “Dituria”. Në reagimin e tij, Elmazi shprehu keqardhje të thellë për incidentin, duke e cilësuar ngjarjen shqetësuese dhe të papranueshme.
Ai bëri të ditur se rasti është paraqitur menjëherë në organet kompetente dhe se institucionet përgjegjëse tashmë kanë nisur procedurat ligjore për të garantuar përgjegjësinë e të gjithë të përfshirëve.
Elmazi njoftoi gjithashtu se komuna ka ndërmarrë masa shtesë për rritjen e kontrollit dhe sigurisë në të gjitha shkollat e Sarajit, në mënyrë që të parandalohet përsëritja e situatave të ngjashme.
Në fund, kryetari u bëri thirrje prindërve për më shumë bashkëpunim me institucionet arsimore, duke theksuar se edukimi dhe siguria e fëmijëve janë përgjegjësi e përbashkët. Ai apeloi për komunikim dhe kujdes të shtuar, në mënyrë që fëmijëve t’u sigurohet një ambient i qetë dhe i sigurt në shkollë.
