Një suprizë befasuese vjen nga Tirana. Elisa Spiropali, kryetare e Kuvendit të Shqipërisë “qëlloi” përsëri në shenjë. Mbas disa paraqitjesh befasuese edhe në diplomacinë parlamentare, në trekëndëshin Tiranë-Prishtinë-Shkup, politikania luftarake nga Tirana bën një zgjedhje e cila do të komentohet gjatë. Ajo ka ftuar në kabinetin e saj një nga emrat më interesantë të botës shqiptare në Maqedoninë e Veriut, Liridona Beqiri Limanin. Liridona, juriste dhe aktiviste shumë e njohur shqiptare në Shkup, është emëruar këshilltare e jashtme politike në kabinetin e kryetares së Parlamentit shqiptar.
E njohur si polemiste e vendosur dhe me një curriculum mbreslënës, njohëse e shkëlqyer e Ballkanit dhe marrëdhënieve mes fqinjëve, Liridona Beqiri Limani do të jetë padyshim një vlerë e shtuar në kabinet e në krah të zonjës së hekurt nga Shqipëria, e njohur gjithashtu si një nga polemistet më të zëshme politike në Kuvendin e Shqipërisë, ku tashmë prej muajsh është e para mes të barabartëve.
Ky është një sinjal domethënës, duke shënuar keshtu një moment të paprecedan i një pozite të tillë dhe të rëndësishme në drejtimin e bashkepunimit politik, që me gjasë do të pasohet edhe nga hapa të tjerë, i erës së ndryshme që po fryn për pozitën e gruas shqiptare, që në Shqipëri, kryesisht si pasojë e vullnetit të kryeministrit Edi Rama, ka arritur në nivele të pamenduara më parë. Gratë në politikë, qeverisje e administratë, janë tashmë një rregull dhe jo përjashtim në Tiranën politike. Ato duhet të vlejnë edhe si një shembull që së paku për sa i përket faktorit shqiptar në Maqedoninë e Veriut, diferencat shumë të dukshme të përfaqësimit të grave dhe burrave në të gjitha nivelet e shoqërisë, të nisin të ndryshojnë në kahun e duhur. Ka ende shumë pak gra e vajza shqiptare që lejohet të shkelin në viset e politikës duke e bërë atë domen vetëm të burrave.
Dhe për më shumë, ky është edhe një sinjal domethënës i asaj që po vetë Spiropali e ka thënë në Tiranë, Prishtinë e Shkup, si një nevojë për bashkëpunim më të fortë të faktorit shqiptar në të gjitha nivelet.
