Programi i Premierligës së së dielës u hap nga derbi i Londrës, mes Chelsea dhe Crystal Palace. Pas 45 minutave të para rezultati ishte i njëjtë me atë pas fishkëllimës fillestare. Megjithatë, rezultati nuk ishte thjesht mungesë rastesh, por një vendim shumë “interesant” nga gjyqtari Darren England.
Konkretisht, ishte minuta e 13-të kur gjyqtari anglez akordoi një goditje dënimi për Crystal Palace në buzë të zonës së penalltisë. Eberechi Eze, ylli i Eagles i cili është lidhur shumë me një transferim te Tottenham javët e fundit, mori përgjegjësinë dhe çoi topin drejt e në rrjetën e Roberto Sanchez me një gjuajtje të pabesueshme.
Eze dhe shokët e ekipit festuan golin, por euforia u ndërpre nga VAR. Dhe arsyeja është vërtet e çuditshme. Sipas shpjegimit të arbitrit Marc Guehi iu afrua murit të lojtarëve të Chelsea në një distancë më të vogël se një meter, veprim ky i ndaluar sipas rregullave të FIFA-s.
“Pas një shqyrtimi, u përcaktua se lojtari mysafir, numri gjashtë, ishte më pak se një metër larg murit në momentin e goditjes. Si rezultat, u akordua një goditje e lirë indirekte dhe goli u anulua”, tha England në altoparlant.
