Mbrëmjen e djeshme rreth orës 23:30, në Sektorin për Punë të Brendshme Tetovë është raportuar se dy punonjës të operatorit celular A1, të cilët ndodheshin mbi fshatin Lazaropole, pranë stacionit bazë të operatorit, kishin mbetur të bllokuar nga bora. Me ta nuk ishte e mundur të vendosej kontakt për shkak të mungesës së rrjetit celular.
Menjëherë pas njoftimit, rasti është përcjellë në Stacionin Policor Rostushë, pas së cilës janë angazhuar pjesëtarë të Njësisë për Operacione Speciale Policore, të Policisë së Uniformuar pranë MPB-së, si dhe ekipe nga Drejtoria për Mbrojtje dhe Shpëtim.
Me dy automjete terreni, të pajisura me slita për borë dhe pajisje adekuate shpëtimi, ekipet janë nisur drejt vendngjarjes.
Sot rreth orës 08:30, personat janë gjetur dhe janë nxjerrë me sukses, në gjendje të mirë shëndetësore. Bëhet fjalë për G.N. (47) dhe M.M. (37), të dy nga Shkupi, të cilët po udhëtonin me një automjet terreni të tipit “VW Amarok” me targa të Shkupit.
Ata janë gjetur në një lokacion të njohur si “Koritnik”, pranë transmetuesit të rrjetit të A1, në territorin e fshatit Lazaropole.
