Mbrëmë, 31-vjeçarja dyshohet se e ka vrarë 45-vjeçarin nga Obiliqi, me të cilin dyshohet të ketë pasur lidhje.
E, familjarët e 73-vjeçares që vdiq sot nga Majaci i Podujevës kanë deklaruar për KosovaPress se e dyshuara 31-vjeçare, pasi e kishte kryer vrasjen e 45-vjeçarit nga Obiliqi, kishte hyrë në shtëpinë e viktimës 73-vjeçare, e cila nuk iu mbijetoi plagëve të marra.
Familjarët, të cilët nuk deshën të flasin para mediave, treguan se 31-vjeçarja dyshohet se i kishte marrë peng 73-vjeçaren, si dhe bashkëshorten e djalit të saj me fëmijët e saj. Por ajo tashmë është në gjendje shoku.
73-vjeçarja është gruaja e axhës së të dyshuarës 31-vjeçare, por familjarët thanë se dy familjet kishin raporte shumë të mira.
Sipas raportit 24-orësh të Policisë së Kosovës, mbrëmë rreth orës 18:40 është pranuar informata se në këtë fshat, një person që ndodhej në një veturë ishte pa shenja jete. Njësitë relevante policore, hetimet dhe forenzika kanë dalë menjëherë në vendin e ngjarjes, si dhe janë njoftuar prokurori kompetent dhe ekipet mjekësore.
Në vendin e ngjarjes është hasur një veturë e tipit “VË”, ngjyrë e bardhë, me targa lokale 01, e cila ka rezultuar në pronësi të një mashkulli kosovar nga Obiliqi. Ekipi mjekësor ka konstatuar se personi i hasur në automjet ishte pa shenja jete.
Referuar hetimeve fillestare, policia ka siguruar informacion se një person i gjinisë femërore ndodhej brenda një shtëpie, posedonte armë zjarri dhe nuk pranonte të komunikonte me askënd, duke paraqitur rrezik për veten dhe për të tjerët. Në këtë situatë janë angazhuar Njësia Speciale Intervenuese dhe zyrtarët për ndërmjetësim, të cilët kanë ndërhyrë dhe kanë vënë situatën nën kontroll.
Brenda shtëpisë janë gjetur dy persona të gjinisë femërore me plagë të rënda, por me shenja jete. Sipas policisë, atyre u është ofruar trajtim mjekësor nga njësia emergjente dhe më pas janë dërguar në Qendrën Klinike Universitare të Kosovës nën mbikëqyrje mjekësore dhe policore.
Instituti i Mjekësisë Ligjore ka bërë tërheqjen e trupit të pajetë nga vendi i ngjarjes. Policia ka njoftuar se më 23 mars 2026, rreth orës 03:35, njëra nga viktimat femra ka ndërruar jetë në QKUK, vdekjen e së cilës e ka konstatuar mjeku kujdestar. Me urdhër të prokurorit nga Departamenti i Krimeve të Rënda, trupi i pajetë është dërguar në Institutin e Mjekësisë Ligjore për obduksion, ndërsa rasti është ri-cilësuar si “Vrasje e rëndë” dhe “Mbajtje në pronësi, kontroll ose posedim të paautorizuar të armëve”.
Prokuroria Themelore në Prishtinë ka bërë të ditur se, si pasojë e të shtënave me armë zjarri, kanë humbur jetën dy persona me inicialet I.B. dhe M.G., ndërsa e dyshuara ndodhet në gjendje të rëndë shëndetësore. Gjatë ekzaminimit të vendit të ngjarjes është sekuestruar një armë zjarri, disa gëzhoja dhe prova të tjera materiale relevante për rastin.
Sipas prokurorisë, motivi i rastit ende nuk është i njohur, ndërsa hetimet po vazhdojnë për ndriçimin e plotë të ngjarjes.
