Nga sot, 15 gusht, deri më 15 shtator, qytetarët do të mund të përfitojnë nga zbritjet deri në 15% për blerjen e pajisjeve shkollore, në kuadër të masës “Shporta shkollore”. Lajmin e bëri të ditur ministri i Ekonomisë dhe Punës, Besar Durmishi, i cili e cilësoi këtë si një shembull të qartë të përkushtimit për të ndihmuar qytetarët dhe për të mbështetur arsimin.
Zbritjet do të përfshijnë një gamë të gjerë produktesh, nga fletoret, çantat e shpinës, lapsat dhe ngjyrat e drurit, deri te kalkulatorët dhe pajisjet e tjera të nevojshme për nxënësit. Produktet e përfshira në masë do të jenë të shënuara qartë me etiketën “Më pak shpenzime, më shumë për ty”.
Sipas Durmishit, këtë vit priten kursime deri në 2.000 denarë për çdo nxënës, duke u mundësuar familjeve më shumë mjete për nevoja të tjera. Vitin e kaluar, kjo masë solli kursime të konsiderueshme për mijëra familje, ndërsa sivjet synohet mbështetje edhe më e madhe.
“Qëllimi ynë është që çdo fëmijë të fillojë vitin shkollor me buzëqeshje dhe shanse të barabarta, ndërsa prindërit të ndiejnë një lehtësim të vërtetë në buxhetin familjar. Ne do të vazhdojmë të punojmë me të njëjtin përkushtim për arsim më të mirë dhe mbështetje për të gjithë qytetarët”, u shpreh ministri.
Ai gjithashtu uroi të gjithë nxënësit për një vit shkollor të suksesshëm, të lumtur dhe të përmbushur.
