Ministri i Ekonomisë, Besar Durmishi, në përmbledhje të rezultateve për vitin kalendarik 2025 theksoi edhe njëherë se RMV-ja mbetet vendi me çmimet e ushqimit më të ulëta në Evropë, si dhe sipas tij, këto informacione vijnë nga institucione relevante, siç është “Eurostat”.
Por, kjo bindje dhe perceptim që është ndërtuar tek opinioni, rrjedh nga fakti se ka çmime të larta vetëm tek ato të cilat janë në bursën botërore.
“Po, është ai perceptim në opinion se ka rritje të çmimeve të produkteve ushqimore, por ajo ka të bëjë vetëm me ato produkte ushqimore të cilat janë në bursën botërore, ku ne si Ministri dhe Qeveri nuk mund të ndikojmë. Inspektorati Shtetëror i Tregut këtë vit ka pasur rekord kontrolle apo rreth 25 mijë kontrolle, që kanë shqiptuar gjoba në vlerë prej 2.5 milionë euro dënime për të gjithë ato tregtarë, prodhues dhe distributorë, të cilët nuk e kanë respektuar ligjin apo janë sjellë në formën devijuese.”, – deklaroi ministri i Ekonomisë, Besar Durmishi.
Ministri Durmishi po ashtu foli edhe për shportën mesatare konsumatore, ku sipas të cilit, është propozuar dhe dorëzuar deri tek Këshilli Ekonomik Social, është kompletuar metodologjia se si do të përllogaritet dhe tani janë në fazën e pritjes së vërejtjeve dhe propozimeve apo edhe kritikave të cilat i kanë 12 anëtarët e Këshillit Ekonomik Social. Ministri Durmishi po ashtu theksoi se RMV-ja nuk është me pagën minimale më të ulët në rajon dhe se ka vende siç janë Bullgaria, Turqia, Shqipëria, por duhet të punohet në këtë drejtim që paga minimale të rritet.
“E kam potencuar disa herë që nuk jemi me pagën minimale më të ulët në rajon. Ka vende tjera, siç është Bullgaria, Turqia, Shqipëria, është Kosova, por tani për tani nuk jemi më të ulët në rajon. Po, është fakt që duhet të punojmë që paga minimale të rritet, por ajo të jetë e qëndrueshme, duke u bazuar në rritjen ekonomike dhe jo të ketë rritje ad-hok, siç ka ndodhur në të kaluarën. Nëse do të sillnim një vendim të tillë në rritje ad-hok të pagës minimale, do të përballemi me rritje të inflacionit, do të përballen kompanitë e vogla dhe të mesme me probleme financiare ku do të detyrohen që të largojnë nga vendi i punës punëtorët të cilët i kanë. Në mars do të kemi një rritje prej 1.500 apo 2.000 denarëve, por duhet të presim që të përfundojë viti kalendarik.”, – theksoi ministri i Ekonomisë, Besar Durmishi.
Në rezymenë për përmbylljen e vitit 2025, ministri i Ekonomisë, Durmishi, po ashtu theksoi se ky vit ka qenë i përkushtuar në rritjen ekonomike të qëndrueshme, mbështetje për investimet dhe lehtësim në procedurat për bizneset.
Për vitin 2026, fokusi do të jetë në planin operativ për programin e masave aktive të punësimit, ku buxheti është 2.39 miliardë denarë.
Theks do t’u jepet projekteve të të rinjve për punësim, vetëpunësim dhe trajnim në aftësitë e kërkuara nga tregu.
