Një histori e pazakontë vjen nga SHBA-ja, ku një burrë nuk mund të çlirohet nga kthetrat e burokracisë.
Sobuza Uilliams nga San Francisco ndoshta ka qenë njeriu më fatkeq vitin e kaluar, pasi mori mbi 150 gjoba me një vlerë totale prej 28 mijë dollarësh (rreth 27 mijë euro) – dhe ai as që zotëron një automjet.
Problemi qëndron në faktin se Uilliams e shiti këtë SUV luksoz në vitin 2023 për vetëm 1000 dollarë, pasi kishte probleme mekanike, raporton San Francisco Chronicle.
Megjithatë, për shkak të burokracisë, vetura kurrë nuk u transferua plotësisht në emrin e blerësit, dhe Uilliams nuk mund të shpëtojë nga gjobat, pavarësisht se sa herë u është drejtuar institucioneve përkatëse.
Ai pranon se “mund të kishte qenë më i kujdesshëm”, por thekson se autoritetet e Kalifornisë nuk kanë përpunuar një dokument kyç që do ta lironte nga përgjegjësia.
Ai e shiti veturën te një mik, pasi u morën vesh në një kafene për dorëzimin e saj. Miku i dha menjëherë 1000 dollarë në dorë në këmbim të çelësave, por filloi ta ngiste veturën përpara se të përfundonin dokumentet.
Gjoba filluan të grumbulloheshin menjëherë. Në fillim, Uilliams i paguante, por më pas u detyrua të kërkonte përfundimin e transferimit të pronësisë pasi kostoja u bë e papërballueshme. Ai madje i dërgoi mesazhe mikut që bleu automjetin, i cili e siguroi se do ta rregullonte situatën – por kurrë nuk ndodhi.
Të gjitha dokumentet që vareshin nga Uilliams janë plotësuar dhe dorëzuar te institucionet përkatëse. Tani gjithçka varet nga blerësi, “miku” i tij (edhe pse ky status tani është i diskutueshëm). Derisa ai të vendosë të dorëzojë dhe nënshkruajë pjesën e tij, Uilliams nuk ka zgjidhje tjetër përveçse të presë.
