Këngëtarja me famë botërore, me prejardhje shqiptare, Dua Lipa, ka lansuar një linjë kufizuar të veshjeve të treningut.
Lajmin e ka bërë të ditur vet ajo përmes një postimi në llogarinë e saj në Instagram.
“Po vjen linja e re për trening!!! Shpresoj të jeni po aq të obsesionuar sa unë”, ka shkruar Lipa.
Veshjet duket se vijnë si inspirim nga kënga e saj e fundit “Training Season” të cilën e lansoi gjatë këtij muaji.
Në linjën e veshjeve sportive të Lipas përfshihen dy bluza sportive me mëngë të shkurtra me mbishkrim “training season”, një set i geteve sportive me ngjyrë të kaltër të errët të kombinuara me disa vijëzime bardh e zi në stil të viteve të 90-ta, një bluzë e stilit ‘polo’ me mëngë të gjata, si dhe një bluzë tjetër me mëngë të shkurtra që i ngjan një fanelle futbollit, e cila është me vija vertikale të kuqe të errët dhe kaltër të errët, mbi të cilat shkruhet ‘training season’ gjithashtu.
Sa i përket koleksioneve të veshjeve, ky nuk është koleksioni i parë që Lipa ka bërë.
Ajo ka bashkëpunuar në të kaluarën me brende të famshme të modës së lartë si “Versace”, bashkë me drejtoreshën kreative Donatella Versace, bëri një koleksion të quajtur “La Vacanza”, i cili debutoi në Kanë, ku të pranishëm ishin shumë persona të famshëm të fushave të ndryshme, duke përfshirë Troye Sivan, Peggy Gou e Lous Hamilton. Ky koleksion bëri bujë të madhe në botën e modës dhe u mirëprit e mori kritika pozitive nga adhuruesit e njohësit e fushës.
Për veshje sportive ajo pati bashkëpunuar me brende si “Puma”, me të cilin bëri një koleksion të quajtur shqip “Flutur”. Për dizajnimin e këtij koleksioni drejtorët e brendit i patën dhënë Lipas dhe stilistit të famshëm Lorenza Posocco, qasje në arkivat e brendit në mënyrë që të bënin një kurim për krijimet e reja duke u inspiruar nga stili që brendi kishte gjatë viteve 90-të.
Këngëtarja pati bashkëpunuar edhe me brendin e njohur të veshjeve sportive “Adidas”, në vitin 2018 kur u bë fytyra që reklamonte atletet “adidas samba” të cilat sot janë shumë të popullarizuara.
Përveç këtyre atleteve ajo ka reklamuar edhe gete të brendit si dhe veshje fitnesi bashkë me modelen e njohur Karlie Kloss.
Moda është një pasion i kamotshëm i Lipas, pasi ajo karrierën e kishte filluar si një blogere mode.
https://www.instagram.com/p/C3qH4F3ME_r/?utm_source=ig_embed&ig_rid=df8b2188-fa51-41ff-a84b-9e5f53a0344f
