Dita Botërore e Ushqimit kremtohet nga Organizata e Kombeve të Bashkuara për Ushqimin dhe Bujqësinë (FAO) çdo vit më 16 tetor datë e cila përkon me themelimin e FAO në vitin 1945.
Kjo ditë organizohet qe nga 1981 dhe synon të sensibilizojë politikë-bërësit mbi rëndësinë e ushqimit dhe rolin e tij në shëndetin dhe mirëqenien e individit dhe zhvillimin e mbarë kombeve.
Tema e vitit 2025 është “Dorë për dorë për ushqime më të mira dhe një të ardhme më të mirë.
Në disa vende, ashpërsia e pasigurisë ushqimore është e madhe. Rreth 673 milionë njerëz jetojnë me uri, sipas FAO-s. Diku tjetër, nivelet në rritje të obezitetit dhe shpërdorimi i përhapur i ushqimit tregojnë një sistem jashtë ekuilibrit – ku bollëku dhe mungesa bashkëjetojnë, shpesh krah për krah.
Sistemet agro-ushqimore janë gjithashtu një burim i madh i emetimeve të gazrave serrë. Megjithatë, ato ofrojnë potencial të vërtetë për të zvogëluar këto emetime përmes mënyrës se si rritet, korret dhe ndahet ushqimi.
Përmbushja e nevojave të një popullsie globale në rritje kërkon punë ekipore – përtej kufijve, sektorëve dhe brezave.
