Sot, në një konferencë për shtyp, ministrja e Financave, Gordana Dimitrieska-Koçoska deklaroi se të dhënat e publikuara nga Enti Shtetëror i Statistikave për rritjen e PBB-së në vitin 2025 janë konfirmim i qasjes së kujdesshme dhe serioze në planifikimin dhe udhëheqjen e politikës fiskale dhe theksoi se sipas të dhënave, rritja reale e PBB-së në vitin 2025 arriti në 3.5%, në përputhje me projeksionet e Ministrisë së Financave, ndërsa rritja nominale është disi më e lartë sesa ishte parashikuar.
“Sot, Enti Shtetëror i Statistikave publikoi të dhënat për rritjen e ekonomisë në vitin 2025 dhe kjo për Ministrinë e Financave dhe Qeverinë është treguesi më i madh se politikat, edhe në kushte pasigurie, mund të hartohen dhe të japin rezultate”, nënvizoi Dimitrieska-Koçoska.
Sipas të dhënave të publikuara, në tremujorin e katërt të vitit 2025, rritja e PBB-së ishte 3.8%, me ç’rast kjo për ministren është konfirmim i trendeve pozitive ekonomike në vend dhe tregon vazhdimësi në arritjen e rezultateve pozitive në ekonomi, që e ka ruajtur për 6 tremujorë radhazi këtë ritëm, ku u krijuan edhe kushte për arritjen e normave më të larta të rritjes.
“Veçanërisht e rëndësishme është se kjo vijon pas rritjes së lartë prej 4.3% në tremujorin e njëjtë të vitit të kaluar, çka tregon për vazhdimësinë e performancës ekonomike”, theksoi ministrja.
Krahasuar me vendet e rajonit dhe BE-në, Maqedonia është përsëri ndër vendet me rritjen më të lartë (i katërti), me ç’rast rritje më të lartë kanë shënuar vetëm Malta, Qiproja dhe Polonia. Nëse krahasohemi me vendet e rajonit, rritja në Serbi është 2.2%, në Kroaci 3.6%, në Bullgari 3.0%, në Slloveni 2.0%, etj.
Në konferencën për shtyp, ministrja theksoi se rritja e aktivitetit ekonomik në tremujorin e katërt është me bazë të gjerë dhe se dinamika e fuqishme në ndërtimtari vazhdoi me rritje prej 14.6%. Sipas të dhënave në dispozicion, kjo rritje i atribuohet aktivitetit të shtuar në ndërtimet e ulëta, që në tremujorin e katërt u shënua rritje reale prej 12.5% në tremujorin e katërt, ku siç theksoi ajo, ky është konfirmim tjetër se përkushtimi i fuqishëm i Qeverisë për realizimin e investimeve kapitale dhe optimizimin e kostove, dinamikën dhe kushtet e ndërtimit ka kontribuar në përshpejtimin e aktivitetit ekonomik. Gjithashtu, ajo theksoi rritjen e lartë prej 8.1% në veprimtaritë profesionale dhe shkencore, rritjen prej 4.4% në tregti dhe transport, rritjen prej 3.6% në industrinë e përpunimit, si dhe 2.7% në veprimtaritë e pronave të patundshme etj.
“Ajo që është veçanërisht inkurajuese është rritja e lartë e eksportit të mallrave dhe shërbimeve prej 9.7% në bazë reale, që tregon për rimëkëmbjen e mëtejshme të aktivitetit eksportues, që ka nisur në fillim të vitit, pas rënies në vitet e kaluara. Nga ana tjetër, importi shënoi rritje prej 3.3%, me ç’rast eksporti neto ka patur ndikim pozitiv në aktivitetin ekonomik. Konsumi privat mbeti stabil me rritje reale prej 2.0%, i nxitur nga rritja e pagave”, theksoi ministrja e Financave.
Ajo theksoi se ekonomia vendore në periudhën e kaluar është nën ndikimin e fuqishëm të zhvillimeve të jashtme për shkak të hapjes sonë të madhe tregtare, por kjo, siç tha ajo, është sfidë që mbetet para nesh si Qeveri dhe ashtu siç kemi dëshmuar deri më tani në 20 muajt paraprake ku treguam se si punohet me plan ekonomik dhe me të njëjtin ritëm do të vazhdojmë. Do të krijojmë masa dhe politika që janë në interes të ekonomisë dhe të qytetarëve, normalisht duke marrë parasysh gjendjen në nivel ndërkombëtar”, deklaroi ministrja e Financave.
Në konferencën për shtyp ajo theksoi se deficiti buxhetor për vitin 2025 është në kuadër të pritshmërive prej 4.0% të PBB-së, ndërsa borxhi publik ka pasur ulje dhe sipas të dhënave të publikuara nga ESHS-ja është 59.3% e PBB-së.
