Dhuna ndaj punonjësve shëndetësorë është e patolerueshme dhe se të punësuarit në shëndetësi duhet të ndihen të sigurt në vendin e punës. Kjo u theksua nga ministri i Shëndetësisë, Azir Aliu, kryetarja e Odës së Mjekëve, me rastin e shënimit të Ditës Evropiane për Ndërgjegjësimin kundër Dhunës ndaj Punonjësve Shëndetësorë.
“Për sistemin shëndetësor është thelbësore që të punësuarit të ndihen të sigurt në vendin e tyre të punës, në mënyrë që të mund të ofrojnë mbrojtjen dhe kujdesin e nevojshëm shëndetësor për pacientët. Gjatë periudhës së fundit, Oda e Mjekëve ka realizuar disa hulumtime mbi këtë temë dhe të dhënat tregojnë se një pjesë e mjekëve kanë raportuar se kanë qenë të ekspozuar ndaj ndonjë forme dhune në vendin e punës, ndërsa një numër më i madh kanë qenë të ekspozuar ndaj dhunës verbale. Për ne si Ministri është e rëndësishme që po zbatohen me sukses ndryshimet në Kodin Penal, me të cilat dhuna ndaj një punonjësi shëndetësor gjatë kryerjes së detyrave profesionale konsiderohet si dhunë ndaj një personi zyrtar dhe përbën vepër penale për të cilën parashikohet dënim me burg.”, – deklaroi ministri i Shëndetësisë, Azir Aliu.
“Nuk jemi askush nga ne idealë, por kjo nuk do të thotë që duhet të trajtohemi me dhunë. Nuk do të thotë që njerëzit që punojnë me diçka që është vërtet e shenjtë me jetë njerëzish, të ndihen të frikësuar, jo të sigurt kur përpiqemi t’i ndihmojmë ndokujt.”, – theksoi kryetarja e Odës së Mjekëve, Kalina Stardellova.
Ministri Aliu po ashtu theksoi se roli i Odës së Mjekëve është veçanërisht i rëndësishëm, pasi ajo monitoron në mënyrë aktive veprimet e institucioneve kompetente dhe propozon masa dhe politika për parandalimin e dhunës në kujdesin shëndetësor dhe gjithashtu kujtoi se çdo dhunë ndaj një punonjësi të kujdesit shëndetësor duhet të raportohet menjëherë, pasi bëhet fjalë për vepër penale.
