Dhjetëra ushtarë u vranë në përleshjet gjatë natës midis forcave pakistaneze dhe afgane, thanë të dyja palët të dielën, raporton Anadolu.
Duke iu drejtuar një konference për shtyp në Kabul, Zabihullah Mujahid, zëdhënësi i qeverisë së përkohshme afgane, pretendoi se në përleshje u vranë nëntë ushtarë afganë dhe 58 pakistanezë, ndërsa 30 të tjerë u plagosën.
Sipas tij, më shumë se 20 poste sigurie që i përkisnin Pakistanit u morën nga forcat afgane.
Megjithatë, ushtria pakistaneze tha se 23 ushtarë të saj u vranë, ndërsa 29 të tjerë u plagosën në përleshje, një nga më të përgjakshmet që nga kur Talibanët rimorën pushtetin në Afganistan në gusht 2021.
Në një deklaratë, ushtria tha se më shumë se 200 “forca Talibane dhe të afërmit e Khwarji” u vranë në përleshje, ndërsa numri i të plagosurve është “shumë më i lartë”.
“Si rezultat i këtyre operacioneve të pandalshme, u shkatërruan shumë vende të Talebanëve përgjatë gjithë kufirit, 21 pozicione armiqësore në anën afgane të kufirit u morën gjithashtu përkohësisht dhe shumë kampe trajnimi terroristësh, të përdorura për të planifikuar dhe lehtësuar sulme kundër Pakistanit, u bënë të papërdorshme”, thuhet në deklaratë.
