Bordi i Paqes i sapoformuar i Presidentit Donald Trump do të mblidhet sot, në takimin e parë në Washington. Ky takim shënon mbledhjen e parë zyrtare pas asaj themeluese që u mbajt gjatë Samitit të Davosit më 20 janar 2026.
Sekretarja për shtyp e Shtëpisë së Bardhë, Karoline Leavitt, tha të mërkurën se më shumë se 20 vende do të përfaqësohen në mbledhjen e së enjtes dhe se do të jepen detaje për ndarjen e 5 miliardë dollarëve në kontribute.
Leavitt u pyet për shumë detaje lidhur me rindërtimin e Gazës dhe 5 miliardë dollarët që bordi pritet të mbikëqyrë. Ajo shmangu dhënien e shumë prej këtyre detajeve, duke thënë se ato do të bëhen publike gjatë mbledhjes.
Kur u pyet se kush do të menaxhojë vendimet financiare të bordit, Leavitt tha se Trump, si kryetar i organizatës, do ta bëjë këtë, por do të ketë edhe nivele të tjera anëtarësh, përcjell gazeta online Reporteri.net.
“Do të jetë Bordi i Paqes, ku presidenti është, natyrisht, kryetari,” tha ajo. “Por të gjitha palët anëtare, besoj, do të kenë vota për financimin. Dhe pastaj, natyrisht, ekziston ajo shtresë teknokratike, nën Bordin zyrtar të Paqes me vendet anëtare, që do të marrin gjithashtu vendime.”
Një zyrtar i lartë amerikan i tha ABC News se do të ketë përditësime mbi përpjekjet e bordit, përfshirë ndihmën humanitare për Gazën, Komitetin Kombëtar për Administrimin e Gazës dhe Forcën Ndërkombëtare të Stabilizimit. Përditësimet do të jepen nga një sërë folësish, përfshirë Trump, Sekretarin e Shtetit, Marco Rubio, të dërguarin special të Shtëpisë së Bardhë, Steve Witkoff, dhëndrin e Trump, Jared Kushner, i cili bashkë me Witkoff ka negociuar për një marrëveshje paqeje mes Izraelit dhe Hamasit, ish-kryeministrin e Mbretërisë së Bashkuar Tony Blair, ambasadorin amerikan në OKB, Mike Walz dhe Nickolay Mladenov, ish-koordinatorin special të OKB-së për procesin e paqes në Lindjen e Mesme, i cili do të shërbejë si drejtor i përgjithshëm i bordit.
Mbledhja do të mbahet në Institutin e Paqes Donald J. Trump, i cili u riemërua nga Instituti Amerikan i Paqes në dhjetor, pasi administrata e Trump më herët gjatë vitit kishte shkarkuar shumicën e bordit dhe stafit të institutit si pjesë e përpjekjeve të Departamentit të Efiçencës Qeveritare për të ulur ndihmën e jashtme amerikane.
Më shumë se dy duzina vende kanë pranuar ftesën e Trump për t’iu bashkuar Bordit të tij të Paqes, përfshirë fuqi të Lindjes së Mesme si Izraeli, Katari, Arabia Saudite, Turqia dhe Egjipti. Vlen të theksohet se asnjë nga aleatët kryesorë evropianë të SHBA-së nuk i është bashkuar bordit, ndërsa disa prej tyre kanë shprehur shqetësime se ai synon të zëvendësojë Kombet e Bashkuara.
I pyetur nga gazetarët të hënën nëse Vatikani do të marrë pjesë si vëzhgues në Bordin e Paqes, Kardinali Pietro Parolin, sekretar i shtetit i Vatikanit, tha se nuk do të marrë pjesë, duke theksuar se ka “çështje të caktuara kritike që duhet të zgjidhen”, sipas Shërbimit të Lajmeve të Vatikanit.
Në një postim në platformën e tij të mediave sociale të dielën, Trump tha se bordi “do të dëshmojë të jetë organi ndërkombëtar më i rëndësishëm në histori”.
Rindërtimi i Gazës pritet të zgjasë me vite dhe mund të kushtojë mbi 70 miliardë dollarë, sipas një vlerësimi operacional të dëmeve dhe nevojave të kryer vitin e kaluar nga OKB-ja, Bashkimi Evropian dhe Banka Botërore.
Gjatë ceremonisë së nënshkrimit muajin e kaluar në Zvicër për Bordin e Paqes, Jared Kushner paraqiti disa nga planet e bordit për rizhvillimin e Gazës.
“Plani kryesor” i paraqitur nga Kushner përfshin qindra rrokaqiej, qytete të reja dhe një zonë turistike bregdetare. Kushner tha se ndërtimi i zhvillimeve do të zgjasë dy ose tre vjet dhe do të kërkojë një investim prej të paktën 25 miliardë dollarësh, por shtoi se fokusi kryesor në muajt e ardhshëm do të jetë dërgimi i ndihmës humanitare në Gaza.
Trump, në postimin e tij të dielën, gjithashtu i bëri thirrje Hamasit të respektojë angazhimin e tij për çarmatimin — një çështje kyçe për sigurimin e një paqeje afatgjatë dhe një komponent i rëndësishëm i planit të paqes të ndërmjetësuar nga SHBA për Gazën.
“Shumë e rëndësishme, Hamasi duhet të respektojë angazhimin e tij për Çarmatim të Plotë dhe të Menjëhershëm,” shkroi Trump.
Në këtë strukturë të re marrin pjesë edhe Shqipëria dhe Kosova.
Shqipëria ratifikoi aderimin me 110 vota pro në Kuvend, pas ftesës së Edi Ramës nga Donald Trump, ndërsa presidentja e vendit Vjosa Osmani përfaqësoi Kosovën në Davos, ku nënshkroi dokumentin themelues.
Presidentja Osmani e ka vlerësuar përfshirjen e Kosovës në Bordin e Paqes, si vend anëtar dhe bashkëthemelues, si një nga zhvillimet më të rëndësishme të politikës së jashtme të vendit në vitet e fundit, duke theksuar se ky hap e fuqizon drejtpërdrejt subjektivitetin ndërkombëtar të Kosovës.
“Republika e Kosovës mbetet e përkushtuar të punojë ngushtë me aleatin tonë kryesor, SHBA-të, dhe me Bordin e Paqes për të sjellë rezultate konkrete, për të mbështetur paqen dhe stabilitetin në rajonet e prekura nga konfliktet dhe për të promovuar një të ardhme të bazuar në bashkëpunim, siguri dhe prosperitet të përbashkët”, ka theksuar Presidentja Osmani.
