Evropa sjell një derbi mes dy ekipeve shqiptare, njëra nga Maqedonia e Veriut dhe tjetra nga Kosova. Drita e Gjilanit në Prishtinë e pret Shkëndijën e Tetovës.
Dy klube historike, dy filozofi loje dhe një synim i përbashkët: fitorja për të ecur tutje në Ligën e Konferencës.
Si Drita ashtu edhe Shkëndija këtë vit për herë të parë kanë arritur në fazën e ligës në Ligën e Konferencës dhe duan të bëjnë mrekulli, për t’u kualifikuar në raundin tjetër.
Sfida mes Dritës dhe Shkëndijës zhvillohet në stadiumin ‘Fadil Vokrri’ sonte (e enjte) me fillim nga ora 21:00, derisa janë shitur deri më tani mbi 10 mijë bileta.
Dy tifozëritë e klubeve kanë paralajmëruar spektakël pasi ndeshja zhvillohet vetëm një ditë para ditës së flamurit.
“Do të jetë një ndeshje festive, do të jetë një spektakël i vërtetë si në tribuna ashtu edhe në fushë. Unë kam besim, që si skuadra e Dritës edhe skuadra jonë është e përgatitur për të dhënë maksimumin. Është ndeshje e një rëndësie të veçantë, pasi ne takohemi në kompeticion europian, më konkretisht në Conference League. Besoj që ekipi është i përgatitur për të dhënë maksimumin, duke respektuar në maksimum edhe ekipin e Dritës. Ne shpresojmë që duke dhënë maksimumin dhe duke arritur që të japim performancën më të mirë tonën, shpresojmë të marrim rezultat pozitiv dhe rezultat pozitiv për ne është fitorja”, tha Jeton Beqiri – Trajner i KF Shkëndija.
“Ata vijnë nga një shtet ku unë jetoj. Është një ndeshje mjaft e veçantë dhe ndoshta jep më shumë presion për shkak se jemi dy skuadra shqiptare në fazën e grupeve dhe ballafaqohemi njëra me tjetrën pikërisht më 27 nëntor, një ditë para festës së flamurit. Gjithçka shkon në presion tonin, jemi para tifozëve tanë dhe e cilësoj që ndeshja me Shkëndijën është ndeshja më e vështirë që e kemi pasur në arenën ndërkombëtare”, Zekirija Ramadani – Trajner i FC Drita.
