Një nismë e re parlamentare është ndërmarrë nga deputetët e Aleancës Kombëtare për Integrim – Frontit Europian, të cilët kanë dorëzuar një Propozim-Rezolutë që kërkon respektimin e standardeve të procesit të rregullt ligjor në gjykimin ndaj ish-krerëve të Republikës së Kosovës.
Nga Bashkimi Demokratik për Integrim (BDI) theksojnë se përmes kësaj rezolute synohet të riafirmohet përkushtimi ndaj shtetit të së drejtës, pavarësisë së gjyqësorit dhe respektimit të të drejtave themelore të njeriut. Sipas tyre, proceset që po zhvillohen në Dhomat e Specializuara të Kosovës duhet të jenë në përputhje me standardet më të larta ndërkombëtare.
Në dokument nënvizohet rëndësia e prezumimit të pafajësisë, garantimit të mbrojtjes efektive dhe zhvillimit të gjykimeve brenda një afati të arsyeshëm për të gjithë të akuzuarit. Po ashtu, rezoluta vlerëson kontributin e udhëheqësve institucionalë dhe të pjesëtarëve të luftës çlirimtare në proceset e paqes, stabilitetit dhe integrimit euroatlantik të rajonit.
Deputetët nënshkrues u bëjnë thirrje të gjithë deputetëve të Kuvendit që ta mbështesin këtë nismë, duke theksuar se drejtësia ndërkombëtare duhet të jetë e paanshme dhe e pavarur nga çdo ndikim politik.
