Huseyin Akkurt, 34-vjeçar, është dënuar me burgim të përjetshëm si i akuzuari kryesor për vrasjen e boksierit profesionist nga Mitrovica, Besar Nimani, në Gjermani vitin që shkoi.
Siç raporton mediumi gjerman RTL, Gjykata Rajonale e Bielefeldit e dënoi të akuzuarin për vrasje tinëzare, teksa bëri me dije se pala ka të drejtë ankese lidhur me vendimin në Gjykatën Federale të Drejtësisë në Kralsruhe, përcjell Insajderi.
Gjykata rajonale me këtë vendim ndoqi kërkesën e prokurorisë. Në kërkesën e tyre, prokurori publik Veit Walter bëri thirrje për dënim të përjetshëm.
Mbrojtësit besojnë se vrasësi nuk është klienti i tyre, por një i dyshuar i cili është ende në kërkim ndërkombëtar.
Kryetari i trupit gjykues Sven-Helge Kleine theksoi se i pandehuri gjithashtu kishte zbatuar një plan të rënë dakord më parë dhe kishte vepruar me qëllimin për të vrarë.
Motivi nuk u sqarua gjatë gjykimit. Megjithatë, deklaratat e dëshmitarëve identifikuan qartë dy burrat, tha Kleine, në arsyetimin gojor pas vendimit.
Sipas gjykatës rajonale, raporti i armëve i Zyrës Federale të Policisë Kriminale identifikonte qartë një gëzhojë që i përkiste armës së të pandehurit. Burri i dytë, i cili gjithashtu u identifikua nga dëshmitarët okularë dhe qëlloi 15 të shtëna, është ende në kërkim ndërkombëtar.
Berat Nimani, vëllai i Besar Nimanit, bashkë me motrën e tij u dorëzuan në polici pasi ky i pari dyshohet se plagosi me armë zjarri babain e të akuzuarit përpara gjykatës së Bielefeldit. /Insajderi.org/
