Kandidati i pavarur për komunën e Vrapçishtit i mbështetur nga VLEN, Zulhajrat Demiri në një bisedë për Lajm ka vlerësuar se secili që futet në garë politike udhëhiqet nga elani për fitore, por kjo, siç thekson, “duhet të llogaritet si një pjesë e kontributit që do të japë dhe shkojë në dobi të qytetarëve”.
“Apel gjithsecilit të na bashkohet neve dhe këtë lloj besimi që do e konvertojmë në votë, t’ua kthejmë qytetarëve me punë e angazhim. Kam një bindje se ata dinë mirë të vlerësojnë se si poltika i ka parë deri më tani votuesit. Besoj thellë në sovranin se ai di të dallojë dhe t’u japë shans individëve ose subjekteve të caktuara politike, por edhe dinë të dënojnë nëse devijojnë nga ai rrugëtim”, ka thënë Demiri.
Ai ka shtuar se nuk do të jetë kryetar vetëm për shirita, por që bashkërisht pret me qytetarët të llgarisin të mirën publike.
“Bashkërisht ta heqim një herë e përgjithmonë atë klientelizëm në kuptimin e asaj se kryetari i komunës është ai i cili i bën të gjitha dhe të tjerët vetëm kontribuojnë në ditën e zgjedhjeve e ne tjerët jemi elita që presim shirita. Unë dua që gjithë bashkërisht ta ndjejnë këtë si pjesë të shtëpisë së vet”, tha Demiri.
Ai ka falënderuar liderët e VLEN-it për mbështetjen duke nënvizuar se ka komunikim të vazhdueshëm edhe me individë dhe struktura të subjekteve tjera.
