Kandidati për kryetar të komunës së Vrapçishtit i mbështetur nga VLEN, Zulhajrat Demiri në Konventën promovuese të mbajtur sonte në Gradec akuzoi opozitën dhe kundërkandidatin e tij Isen Shabani nga AKI, se kërkuan votën me të njëjtat premtime, ndërsa Vrapçishti sot e kësaj dite ka mungesë të ujit.
“Vrapçishti nuk ka as ujë për t’u larë, sepse Iseni bën aksham pazar”, tha në hyrje të fjalimit të tij, Demiri.
Ai iu drejtua kundërkandidatit duke i thënë se kur je gjatë në politikë, “kjo krijon tiran e diktator dhe pastaj bën zullum”, por siç thekson ai, “këtë do e ndalin”.
“Ai na drejtohet duke na thënë individë, ndërsa ata indvidë janë ata të cilët i dhanë mandat për 8 vite dhe thotë se nuk ulem me kundërkandidatin, sepse është ‘personi në fjalë’ dhe i bëj të fala se ka përballë një ish mikun e tij që për bazë ka popullin dhe ky popull do na japë legjitmitetin”, tha Demiri.
Ky popull, shton ai tutje, do i tregoj atij se erdhi me shumë premtime dhe do të ikë me shumë dështime.
“Unë këtë mandat e kërkoj nga ju dhe do ua dorëzoj juve sa herë që mendoni se nuk jemi të denjë ta ushtrojmë atë mandat”, ka thënë Demiri duke shtuar se synon ndryshimin edhe në arsim dhe se askush nuk do të largohet nga puna dhe se ata që kanë vlera, do jenë pjesë e procesit edukativo- arsimor.
