Ministria e Politikës Sociale, Demografisë dhe Rinisë i demanton në mënyrë më të prerë pretendimet e paraqitura në publik për gjoja mosveprim lidhur me rastin në Qendrën Ndërkomunale për Punë Sociale, Tetovë.
Këto akuza janë plotësisht të pabazuara, të pasakta dhe në kundërshtim me faktet.
Inspektorët e Shërbimit Inspektues pranë Ministrisë së Politikës Sociale, Demografisë dhe Rinisë, rregullisht kryejnë mbikëqyrje inspektuese të të gjitha llojeve (të rregullta, të jashtëzakonshme dhe kontrolluese) në IP Qendra Ndërkomunale për Punë Sociale Tetovë, si subjekt i mbikëqyrjes inspektuese.
Në kuadër të këtyre mbikëqyrjeve, ndër të tjera, kryhet vazhdimisht mbikëqyrje inspektuese mbi procedurat për realizimin e të drejtave nga përfitimet financiare, përkatësisht: e drejta për ndihmë minimale të garantuar, e drejta për siguri sociale për të moshuarit dhe e drejta për kompensim financiar për ndihmë dhe përkujdesje nga person tjetër.
Gjatë mbikëqyrjeve inspektuese të rregullta, të jashtëzakonshme dhe kontrolluese, në mënyrë të vazhdueshme shqiptohen masa përkatëse inspektuese me qëllim të eliminimit të parregullsive të konstatuara. Pas shterimit të masave inspektuese, në përputhje me dispozitat ligjore, ndërmerren masa për përcaktimin e përgjegjësisë dhe inicimin e procedurave përkatëse ndaj kryerësve të shkeljeve të konstatuara, përfshirë paraqitjen e kallëzimeve përkatëse pranë organeve kompetente.
Në këtë kontekst, një pjesë e madhe e procedurave penale që zhvillohen para Prokurorisë Publike janë iniciuar nga inspektorët e Shërbimit Inspektues pranë Ministrisë, në mënyrë të pavarur ose në bashkëpunim me Prokurorinë Publike.
Në lidhje me procedurat për realizimin e të drejtave të lartpërmendura nga mbrojtja sociale, inspektorët për mbrojtje sociale nga Sektori për Mbikëqyrje Inspektuese në fushën e mbrojtjes sociale dhe mbrojtjes së fëmijëve, në IP Qendra Ndërkomunale për Punë Sociale Tetovë, gjatë vitit 2024 realizuan dy (2) mbikëqyrje inspektuese të jashtëzakonshme mbi bazë të iniciativave të paraqitura nga qytetarët dhe gjashtë (6) mbikëqyrje kontrolluese për ndjekjen e zbatimit të masave inspektuese të shqiptuara me vendime nga viti 2023, me ç’rast u konstatuan parregullsi në 76 lëndë. Gjatë vitit 2024 u miratuan gjithashtu vendime me të cilat u shqiptuan masa inspektuese për edhe shtatë (7) lëndë të tjera.
Gjatë vitit 2025 është realizuar një (1) mbikëqyrje inspektuese e rregullt, me ç’rast u konstatuan parregullsi në gjashtë (6) lëndë, një (1) mbikëqyrje inspektuese e jashtëzakonshme me parregullsi të konstatuara në pesë (5) lëndë, si dhe gjashtë (6) mbikëqyrje kontrolluese për ndjekjen e zbatimit të masave inspektuese të shqiptuara me vendime të miratuara në vitet 2024 dhe 2025.
Në kuadër të të gjitha mbikëqyrjeve inspektuese të realizuara, janë konstatuar parregullsi në gjithsej 94 lëndë. Sipas mbikëqyrjeve kontrolluese të realizuara, parregullsitë e konstatuara janë eliminuar në 88 lëndë, pas së cilës procedura inspektuese është ndërprerë. Përjashtim bën një mbikëqyrje e realizuar në vitin 2025, në të cilën janë konstatuar parregullsi në gjashtë (6) lëndë, për të cilat mbikëqyrja kontrolluese do të realizohet pas skadimit të afatit të përcaktuar për zbatimin e masave inspektuese.
Është e rëndësishme të theksohet se në rastet kur inspektorët konstatojnë pagesa të pabaza të mjeteve financiare, ata njoftojnë dhe obligojnë institucionet kompetente që të veprojnë në përputhje me dispozitat ligjore, si dhe të ndërmarrin masa për përcaktimin e përgjegjësisë individuale dhe inicimin e procedurave përkatëse disiplinore, kundërvajtëse ose procedurë penale ndaj personave përgjegjës, në përputhje me legjislacionin në fuqi.
