Nevzad Asipi, kryetar i nëndegës Orizare dhe këshilltar komunal në Komunën e Likovës, ka reaguar ndaj pretendimeve të BDI-së, e cila mohoi kalimin e strukturave të nëndegës Orizare në Lëvizjen Demokratike.
“Ashtu siç e kemi bërë publike më herët, unë dhe shokët e mi kemi dhënë dorëheqje nga nëndega e BDI-së Orizare më 28 janar 2025, pas gjashtë vitesh drejtimi, për arsye të shumta që lidhen me imobilizmin politik brenda BDI-së, mosrealizimin e projekteve në fshatin Orizare dhe zonat përreth, pamundësinë për angazhimin e rinisë dhe mungesën e hapësirës për veprim politik. Gjithashtu, kemi refuzuar të bëhemi pjesë e korrupsionit dhe metodave represive që shtypin mendimin ndryshe,” ka shkruar Asipi.
Ai shtoi se beson se këto sfida mund të tejkalohen në Lëvizjen Demokratike dhe në frymën e VLEN, ndaj bashkë me përkrahësit e tij u bëjnë thirrje të gjithë qytetarëve që të bashkohen për ndryshimin e shumëpritur.
“Ne besojmë se kjo është rruga e duhur politike për vendin tonë dhe ftojmë të gjithë ata që ndajnë të njëjtat vlera dhe vizion për të ardhmen, të na bashkohen,” përfundon deklarata e Asipit.
