Bashkimi Demokratik për Integrim edhe një herë rikujton rrugën thellësisht të gabuar dhe të dëmshme në të cilën po ecën Republika e Maqedonisë së Veriut, devijimet strategjike dhe ndryshimet e shpeshta të kursit, që e kanë çuar vendin në një izolim të thellë ndërkombëtar, të paparë në historinë e re të shtetit.
Rezultat i kësaj politike të dështuar është debakli që Kryeministri dhe delegacioni qeveritar përjetuan në Forumin Ekonomik Botëror në Davos – një humbje diplomatike që e marginalizon dhe e vendos në pozitë të nënshtruar gjithë vendin. Në një forum ku praktikisht ishte i pranishëm i gjithë bota, Kryeministri dhe delegacioni qeveritar pothuajse nuk realizuan asnjë takim bilateral domethënës, ndërsa paraqitjet e tyre në periferitë e forumit, përmes videove në rrjetet sociale, e pasqyruan edhe më shumë gjendjen e trishtë në të cilën është sjellë pozita ndërkombëtare e vendit.
Davos-i dëshmoi gjithashtu dështimin e plotë të të ashtuquajturës “diplomaci e perimetrit”. Ndërkohë që shtetet fqinje u ftuan nga Presidenti Trump në të ashtuquajturin “Board of Peace”, vendi ynë mbeti në mesin e të paftuarve. Ndryshimet e papjekura të drejtimit në politikën e jashtme, si dhe pozicionimi i paqartë i vendit ndaj orientimit të vet strategjik, e kanë sjellë sot shtetin në një situatë ku po injorohet si nga Bashkimi Evropian ashtu edhe nga Shtetet e Bashkuara të Amerikës – dy partnerët kryesorë strategjikë të vendit.
Pasojat e këtij izolimi tashmë po ndihen. Dosja evropiane po shtyhet gjithnjë e më shumë anash, vendi po bëhet i cenueshëm ndaj ndikimeve të huaja nga qendra alternative të fuqisë, duke u rrezikuar kolapsi i tërë sistemit politik. Dy investitorë amerikanë e kanë braktisur vendin, investime të reja nuk po vijnë, buxheti po zbrazet, ndërsa standardi ekonomik po i bën qytetarët të jetojnë gjithnjë e më varfër. Kjo nuk është një politikë abstrakte, por një gjendje që do ta godasë drejtpërdrejt çdo familje, çdo punëtor dhe çdo biznes.
BDI paralajmëron se vazhdimi i kësaj gjendjeje izolimi do të ketë pasoja afatgjata dhe vështirë të riparueshme për ekonominë, për stabilitetin dhe për të ardhmen e shtetit. Maqedonia e Veriut nuk guxon të jetë një vend i izoluar, pa aleatë, pa perspektivë dhe pa besim.
