Kryetari i Komunës së Tearcës dhe përfaqësues i VLEN-it, Daut Memishi, tha se Qeveria VLEN mbetet e përkushtuar për ta luftuar korrupsionin deri në fund, edhe në mesin e atyre që duhej ta siguronin drejtësinë.
Duke komentuar arrestimin e gjykatësit të cilit iu gjetën 350.000 euro në murin e shtëpisë, Memishi tha për Lajm TV se lufta ndaj korrupsionit do të vazhdojë deri në fund.
“Në qeverisjen tonë si VLEN, jemi ithtarë të asaj që ta luftojmë korrupsionin deri në fund”, tha Memishi.
Ai shtoi se këto aksione e rikthejnë besimin e qytetarëve te drejtësia.
“Ne jemi të pakompromis në këtë pjesë dhe besoj që të gjitha rastet e tilla në të kaluarën të mos përsëriten. Kur do të dënohet një njeri i tillë, besoj që besueshmëria do të rritet edhe te qytetarët”, deklaroi Memishi për Lajm TV.
Memishi: “Safe city” më shumë në dobi se sa në dëm të qytetarëve
Përfaqësuesi i VLEN-it, Daut Memishi në një intervistë për “Lajm” ka folur për projektin “Safe city” i cili pritet nesër të jetë në rend dite në Kuvend.
Duke iu përgjigjur akuzave të BDI-së opozitare, ai ka thënë se ky sistem do jetë më shumë në dobi të qytetarëve se sa në dëm të tyre.
“Pasi BDI akuzon në këtë rast, ndoshta merr përsipër pjesën e qeverisjes së vet që çdo program apo projekt që ka dashur ta realizojë ka qenë e destinuar të dështojë. Nuk besoj se ‘Safe city’ do të jetë një provë për të dëmtuar qytetarët”, thotë ai.
Ai nuk sheh ndonjë mangësi rreth projektit, meqenëse për fillim është lejuar si një pilot plan.
“Në radhë të parë, jam ithtarë i asaj se dobia do të jetë më shumë e qytetarëve se sa të jetë në dëm për qytetarët. Mendoj se jeta e njerëzve ka çmimin më të lartë se çdo gjë tjetër. Në këtë rast nuk shoh që ka ndonjë mangësi, jorastësisht është lejuar si një pilot plan dhe pastaj do të vendoset në shërbim të qytetarëve”, ka thënë Memishi.
Për fund, Memishi thekson se asnjë iniciativë, apo projekt që siguron mirëqenien dhe sigurinë e qytetarëve, nuk mund të jetë në dëm të qytetarëve.
