Tre persona kanë humbur jetën dhe 15 të tjerë janë plagosur pas një stuhie të fortë dhe rritje të nivelit të detit që goditi ishullin turistik të Tenerife-s, njoftuan autoritetet spanjolle të dielën.
Sipas mediave spanjolle, viktimat u morën nga dallgët e fuqishme në incidente të ndara përgjatë bregdetit të ishullit. Në Charco del Viento, një vend i njohur shkëmbor pranë Icod de los Vinos në veri të ishullit, një 43-vjeçar nga La Orotava u rrëmbye nga deti. Ai u shpëtua nga ajri dhe u transportua me helikopter në spital, por ndërroi jetë pas mbërritjes.
Në një rast tjetër, një burrë u gjet i pajetë në ujërat pranë plazhit Cabezo në El Médano, në jug të Tenerife-s.
Në Puerto de la Cruz, një valë e madhe përplasi disa persona në det. Një grua 79-vjeçare me shtetësi holandeze pësoi atak kardiak dhe ndërroi jetë, ndërsa tre persona të tjerë u plagosën rëndë dhe u dërguan në spital.
Në total, shërbimet emergjente raportuan rreth 15 të plagosur në katër incidente të ndryshme përgjatë bregdetit. Autoritetet kishin paralajmëruar banorët dhe turistët të shmangnin ecjet pranë zonave bregdetare për shkak të erërave të forta dhe rrymave të fuqishme që përfshinë ishullin gjatë fundjavës.
