Cristiano Ronaldo po përgatitet për jetën pas futbollit, teksa mediat spanjolle raportojnë se ylli portugez është gati të hapë një klub privat ekskluziv në Madrid.
Projekti, që mban emrin “Vega”, pritet të jetë investimi i radhës i 40-vjeçarit, ndërsa karriera e tij e shkëlqyer futbollistike po i afrohet fundit.
Sipas Libertad Digital, Ronaldo ka bashkuar forcat me Íñigo Onieva dhe kompaninë Mabel Hospitality, për të krijuar një hapësirë elitare për anëtarë VIP në zemër të kryeqytetit spanjoll.
Sipas projektit, klubi synon të “krijojë një atmosferë elegante dhe të ngrohtë, ku luksi perceptohet si ndjenjë, jo thjesht dekor”.
Në mëngjes, ambienti do të jetë i qetë dhe i rafinuar.
Në mbrëmje, klubi do të shndërrohet në një qendër sociale me darka ekskluzive dhe bare vetëm për anëtarët.
Anëtarësimet e klubit do të jenë të nivelit të lartë: “Founders’ Membership” – vetëm me ftesë, me tarifë unike prej 13,000 £, që përfshin akses të përjetshëm dhe prioritet rezervimesh.
Anëtarësim lokal – mbi 2,000 £ në vit + tarifë fillestare 1,750 £.
Nën 35 vjeç – tarifë vjetore 1,300 £ + rreth 900 £ regjistrim.
Çifte – rreth 1,750 £ në vit.
Bizneset jashtë fushës duket se po ecin po aq mirë sa edhe forma e Ronaldos në fushë.
Ndërsa ndërton projektet e tij të reja, Ronaldo mbetet një nga lojtarët më të rëndësishëm në Saudi Pro League me Al-Nassr dhe po përgatitet për “sulm final” në Kupën e Botës. Portugalia do të marrë pjesë në shortin final më 5 dhjetor, ndërsa kapiteni synon të rrumbullakosë koleksionin e tij me trofeun e vetëm që i mungon.
Në një intervistë me Piers Morgan, Ronaldo foli hapur për kapitullin e tij pas futbollit: “Së shpejti. Do të jetë e vështirë, me siguri do të qaj. Jam person emocional. Por jam përgatitur për këtë që nga mosha 25–27 vjeç. Do të jem gati.”
