Një cisternë ruse e sanksionuar, e ngarkuar me gaz natyror të lëngshëm (LNG), po del jashtë kontrollit në Mesdhe pa ekuipazh në bord dhe me një vrimë të madhe në njërën anë, duke ngritur paralajmërime për një “rrezik serioz të një katastrofe të madhe ekologjike”.
Një zyrtar në Itali, një nga nëntë vendet e BE-së që i kanë dërguar një letër të përbashkët Komisionit Evropian duke kërkuar veprim, e ka quajtur anijen Arctic Metagaz një “bombë mjedisore” gati për të shpërthyer.
Cisterna, pjesë e një “flote në hije” që transporton naftë dhe gaz rus nën sanksione, u dëmtua rëndë nga një sulm i dyshuar me dron pranë ujërave të Maltës në fillim të këtij muaji.
Tani, Arctic Metagaz po lëviz drejt jugut, larg ujërave italiane dhe ishullit të Lampeduzës, në drejtim të Libisë, ndërsa autoritetet italiane dhe malteze vazhdojnë të monitorojnë lëvizjen e saj.
Sekretari i Këshillit të Ministrave, Alfredo Mantovano, tha se rreziqet nga kjo cisternë janë “të jashtëzakonshme” dhe paralajmëroi se ajo mund “të shpërthejë në çdo moment”.
Të martën pasdite, cisterna ndodhej rreth 45 milje detare (83 km) nga ujërat territoriale italiane dhe 25 milje nga zona e kërkim-shpëtimit që i përket Libisë. Arctic Metagaz ishte nisur nga porti rus i Murmanskut në muajin shkurt.
Në fillim të marsit, kur anija u përfshi nga flakët, presidenti rus Vladimir Putin fajësoi Ukrainën për një “sulm terrorist”.
Kohët e fundit, numri dhe shtrirja e sulmeve me dronë ndaj cisternave ruse janë rritur.
Në dhjetor, shërbimi inteligjent ukrainas SBU tha se kishte dëmtuar rëndë tre anije brenda dy javësh në Detin e Zi, përfshirë cisternën Dashan, e cila sipas tyre pësoi “dëme kritike”. Pak më shumë se një javë më vonë, cisterna e naftës Quendil u godit në Mesdhe.
Tani kanë kaluar dy javë që kur Arctic Metagaz u dëmtua rëndë nga një seri shpërthimesh dhe zjarresh. Ekuipazhi u lokalizua dhe u shpëtua nga roja bregdetare libiane.
Fillimisht, zyrtarët e porteve në Libi thanë se anija ishte fundosur, por ajo ka mbetur në sipërfaqe që atëherë, pa ekuipazh dhe shumë e rrezikshme.
Fondi Botëror për Natyrën (WWF) ka deklaruar se është në “gatishmëri maksimale”, duke paralajmëruar se një derdhje e mundshme mund të shkaktojë zjarre dhe ndotje afatgjatë në një zonë me “vlerë të jashtëzakonshme ekologjike”, ku jetojnë shumë specie të mbrojtura.
