Një prej çifteve më të njohura në Hollywood, Nicole Kidman dhe Keith Urban, kanë finalizuar divorcin, pas 19 vitesh martesë.
Gjyqtarja Stephanie J. Williams deklaroi në dokumentet e gjykatës se marrëveshjet e çiftit për ndarjen e pasurive dhe kujdestarinë e fëmijëve janë të mjaftueshme dhe ua miratoi divorcin.
Williams shkroi se “ekzistojnë dallime të tilla të papajtueshme mes palëve, që e bëjnë vazhdimin e martesës jopraktik dhe të pamundur”.
Si Kidman ashtu edhe Urban hoqën dorë nga e drejta për të qenë të pranishëm në seancën dëgjimore.
Kidman paraqiti kërkesën për divorc në shtator. Ndarja e yjeve ishte një surprizë për shumicën e publikut, por ishte e qartë se kishte qenë duke u përgatitur prej kohësh. Të gjitha çështjet ligjore që lidhen me pasuritë dhe kujdestarinë ishin zgjidhur dhe nënshkruar në ditën e paraqitjes së kërkesës.
Shteti i Tennessee kërkon një periudhë pritjeje 90-ditore për çiftet me fëmijë të mitur përpara se divorci të hyjë në fuqi.
Kidman dhe Urban, të dy 58 vjeç, kanë dy vajza adoleshente së bashku. Në kërkesën për divorc thuhej se ata kishin “vështirësi martesore dhe dallime të papajtueshme”.
Plani që ata nënshkruan parashikon që fëmijët të jetojnë me Kidman. Ai sugjeron që ata do të vazhdojnë të jetojnë në Nashville, ashtu siç kanë jetuar gjithmonë. Dokumentet thonë se asnjëri nga prindërit nuk do të ketë nevojë për mbështetje financiare për fëmijët apo bashkëshortin, dhe parashikojnë një ndarje afërsisht të barabartë të pasurive të përbashkëta
