Influencerja italiane, Chiara Ferragni është shpallur e pafajshme në çështjet e njohura si “Pandoro Pink Christmas” dhe vezët e Pashkëve, të cilat kishin shkaktuar debat të gjerë publik në Itali.
Vendimi u mor nga gjyqtari i seksionit të tretë penal të Gjykatës së Milanos, Ilio Mannucci Pacini, i cili nuk pranoi akuzën për mashtrim të rënduar ndaj Ferragni-it, raporton media italiane Ansa.
Ferragni akuzohej se kishte publikuar në rrjetet sociale mesazhe potencialisht mashtruese, duke lënë të kuptohej se një pjesë e të ardhurave nga shitja e produkteve do të përdorej për qëllime bamirësie. Megjithatë, gjykata nuk e njohu rrethanën rënduese të “mbrojtjes së kufizuar” të konsumatorëve online, element kyç që do ta bënte veprën penale të ndiqej edhe pa kallëzim.
Si pasojë, duke qenë se shoqata e konsumatorëve Codacons kishte tërhequr kallëzimin rreth një vit më parë pas një marrëveshjeje dëmshpërblyese me influenceren, gjyqtari vendosi pushimin e çështjes për shkak të shuarjes së veprës penale, e riformuluar si mashtrim i thjeshtë. I njëjti vendim u aplikua edhe për bashkë të pandehurit: Fabio Damato, ish-bashkëpunëtor i ngushtë i Ferragnit, si dhe Francesco Cannillo, president i kompanisë Cerealitalia.
Pas shpalljes së vendimit, Chiara Ferragni, dukshëm e emocionuar, foli shkurtimisht për mediat jashtë sallës së gjyqit “Jemi të gjithë shumë të prekur. Falënderoj të gjithë, avokatët e mi dhe ndjekësit e mi”.
