Komuna e Çairit, nën drejtimin e kryetarit Visar Ganiu, ka nisur një projekt madhor me vlerë prej rreth 500 mijë euro për rikonceptimin e Parkut të Çairit. Projekti përfshin modernizimin e një hapësire prej 13.000 m², duke ruajtur gjelbërimin dhe identitetin ekzistues të parkut.
Gjatë një vizite në park, ku morën pjesë Zëvendëskryeministri i Parë dhe kandidat për kryetar të Komunës së Çairit, Izet Mexhiti, deputetë dhe drejtues institucionesh, u prezantua vizioni për ta shndërruar këtë hapësirë në një qendër funksionale dhe atraktive për të gjitha grupmoshat.
Ky investim synon krijimin e një ambienti bashkëkohor për rekreacion, kulturë dhe aktivitete sportive, duke respektuar elementët natyrorë dhe duke integruar zgjidhje estetike e funksionale që do t’i japin parkut një identitet të ri urban.
Në përfundim, Parku i Çairit pritet të bëhet një nga pikat më tërheqëse të qytetit, duke ofruar hapësira të reja dhe cilësore për qytetarët.
