Kandidati për kryetar të Komunës së Çairit nga koalicioni VLEN, Izet Mexhiti, ka shpallur shndërrimin e rrugës së Çairçanes në bulevard si prioritet absolut nga dita e parë e mandatit të tij.
Gjatë një vizite në zonën ku planifikohet ndërtimi i bulevardit “Cvetan Dimov”, së bashku me kryetarin e BNJVL-së dhe kandidat për kryetar të Qytetit të Shkupit, Orce Gjorgjievski, Mexhiti theksoi se ky projekt është tashmë në fazën e planifikimit dhe do të realizohet përmes bashkëpunimit të ngushtë mes komunës dhe qytetit.
Bulevardi i ri pritet të përfshijë hapësira të gjelbra, trotuare të gjera, shtigje për biçikleta dhe ndriçim modern, duke e shndërruar atë në një nga arteriet kryesore të komunikacionit në Shkup.
“Përveç këtij projekti, me arkitektë të njohur vendas dhe ndërkombëtarë, po punojmë në një masterplan të ri për Çairin, ku bulevardi ‘Cvetan Dimov’ do të ketë rol kyç në zhvillimin urban të komunës”, tha Mexhiti.
Ai rikujtoi se vetëm në 10 muajt e fundit, falë angazhimit në Qeveri, janë siguruar 65 milionë euro për projekte infrastrukturore në Çair, përfshirë parkimin nëntokësor te sheshi “Skenderbeu” dhe kampusin universitar “Nënë Tereza”.
