Presidenti i Bashkimit, Burak Hida ka reaguar ashpër pas incidenteve të ndodhura në duelin kampional ndaj Vardarit, duke akuzuar për padrejtësi në referim dhe fyerje me bazë kombëtare.
Në një deklaratë publike, Hida fillimisht përgëzoi futbollistët e tij për paraqitjen në fushë. “Bravo luana, keni tregu se kush jeni dhe sa zemër keni”, u shpreh ai, duke vlerësuar angazhimin e skuadrës pavarësisht rrethanave të tensionuara.
Sa i përket referimit, kreu i Bashkimit la të kuptohet se klubi i tij është ndier i dëmtuar, duke përmendur veçanërisht kartonin e kuq ndaj lojtarit Rexhepi, për të cilin tha se “u pa qëllimi për ta ndëshku”. Megjithatë, theksi i reagimit të tij ishte te ofendimet që, sipas tij, janë bërë në drejtim të shqiptarëve.
“Të shash shqiptarin, e aq më keq shqiptarin e vdekur, nuk falet”, deklaroi Hida, duke e cilësuar situatën si të papranueshme.
Ai pretendoi gjithashtu se tensionet kanë vazhduar edhe jashtë fushës, duke akuzuar një lojtar të Vardarit për ofendim dhe provokim ndaj ndihmësit të klubit të tij. Sipas Hidës, ndërhyrja e njësisë speciale të policisë ka qenë e ashpër, ndërsa drejtuesit e Bashkimit janë ndier të kërcënuar verbalisht. “Nuk frikësohemi dhe nuk kemi me u frikësu kurrë”, theksoi ai.
Presidenti i Bashkimit shprehu pakënaqësi edhe për faktin që, sipas tij, incidente të tilla kanë ndodhur pranë selisë së FFM-së, duke e quajtur situatën turp dhe padrejtësi me elemente nacionaliste.
Në fund të reagimit, Hida dërgoi një mesazh të fortë simbolik: “Kush qesh i fundit, qesh më së miri. Shqiptari vonon, por nuk harron”, duke shtuar se beson në Zot dhe në drejtësi, ndërsa e mbylli me deklaratën: “Ne jemi Bashkimi, s’jemi si ju.” /Sportmania/
