Gazetari i njohur Avdi Bakija ka reaguar me tone të ashpra ndaj ish-ministrit të Jashtëm, Bujar Osmani, pas deklaratës së tij në rrjetin social X, ku ai kishte shprehur solidaritet me Izraelin dhe dënoi sulmet e Hamasit në kohën kur ishte ministër i Punëve të Jashtme.
Në reagimin e tij, Bakija shkruan se nuk ka më shpirt human që mund të durojë dhimbjen nga gjithë ajo që po ndodh në Gaza, duke e cilësuar situatën si gjenocid të transmetuar drejtpërdrejt para syve të botës.
“Gjithçka që banorët e Gazës kërkojnë nga bota është që ta ngrisim zërin kundër gjenocidit që po na transmetohet 24/7. Të këputet shpirti kur i sheh trupat e copëtuar të fëmijëve, e në rastin tjetër të shndërruar në kockë e lëkurë nga uria e shkaktuar nga një shtet gjenocidal. Askush nuk mund të gënjejë se nuk i ka parë këto pamje, askush nuk mund të prodhojë justifikime hipokrite.” – shkruan Bakija.
Duke thumbuar drejtpërdrejt Osmanin, ai shton se ata që kanë zgjedhur të mbajnë anën e gjenocidit, do të gjykohen nga historia:
“Ndërsa ata që përskaj gjithë këtij tmerri kanë zgjedhur të mbajnë anën e gjenocidit, historia nuk do ua falë. Të gjithë këta meritojnë të përfundojnë në koshin e plehrave.”
Postimi i Bakijës ka ngjallur shumë reagime në rrjetet sociale, duke rihapur debatin për qëndrimin e politikanëve shqiptarë ndaj luftës Izrael–Palestinë.
Ndryshe sot, gjatë konferencë për media derisa fliste në cilësinë e kandidatit për kryetar komune të Çairit nga AKI, Bujar Osmani u mundua të arsyetojë këtë vendim në të cilin kishte dënuar sulmet e Hamasit dhe kishte mbështetur shtetin hebrej.
