Kandidati për kryetar të Komunës së Çairit, Bujar Osmani, zhvilloi një takim me banorët në lagjen Fushë Topanë, ku iu drejtua drejtpërdrejt dhe iu përgjigj propagandës që përhapet lidhur me punën e tij si ministër i Punëve të Jashtme.
“Thonë se si ministër jam shkëputur nga Çairi. Dëgjoni gjuhën, kjo është propagandë”, tha Osmani, duke theksuar se detyrimi i tij si ministër ka qenë i qartë: të përfaqësojë shtetin dhe të sigurojë përkrahje për synimet euroatlantike.
“Detyra ime ka qenë të vizitoj sa më shumë shtete, të sjell sa më shumë ministra dhe kryeministra në Shkup, për të garantuar NATO-n, BE-në dhe marrëdhënie të mira me SHBA-të”, deklaroi Osmani.
Ai nënvizoi se vetëm për katër vite ka tejkaluar të gjithë ministrat e mëparshëm të Jashtëm për nga numri i takimeve, vizitave dhe komunikimeve diplomatike.
“Të gjithë ministrat e Jashtëm të Maqedonisë së Veriut nga ’91 deri më sot nuk mund të tejkalojnë numrin e takimeve dhe komunikimeve që kam zhvilluar unë. Jo pse kam qenë më i mirë, por sepse jam përkushtuar me gjithë zemrën dhe energjinë time, derisa ta arrij rezultatin”, tha Osmani.
Në pjesën emocionale të fjalimit, Osmani theksoi: “Sot, vëllezër e motra, prej jush kërkoj një detyrë: t’ju shërbej vetëm juve. Ju, prej sot, do të jeni Brukseli im. Ju do të jeni ministria ime e Jashtme me të cilën do të mbaj takime”.
Ai shtoi se vjen pa kalkulime, me gjithë forcën dhe përvojën, ndërsa sulmet se ka qenë kryesues i OSBE-së i quajti të ulëta dhe të turpshme.
“Në vend që të krenohen që një djalë nga Serava, nga një familje e varfër, arriti të udhëheqë organizatën më të madhe botërore, ata merren me shpifje të përditshme. Kjo është e ulët. Por unë nuk kthehem për funksione. Kthehem për t’ju shërbyer juve”, tha Osmani.
