Ministria e Energjisë, Minierave dhe Burimeve Minerale vazhdimisht forcon dhe avancon
bashkëpunimin me institucionet relevante në vend, me theks të veçantë në komunitetin kërkimor akademik dhe shkencor, si një partner kyç në krijimin e politikave të qëndrueshme, profesionale dhe afatgjata në sektorin e energjisë dhe minierave.
Në këtë kontest, sot u nënshkrua një Memorandum Bashkëpunimi midis Ministrisë së Energjisë, Minierave dhe Burimeve Minerale dhe Universitetit “ Shën Kirili dhe Metodi’ në Shkup – Fakulteti i Teknologjisë dhe Metalurgjisë, i cili krijon një kornizë institucionale për bashkëpunim të thelluar dhe sistematik në fushat me interes të përbashkët. Memorandumi u nënshkrua nga ministrja e Energjisë, Minierave dhe Burimeve Minerale Sanja Bozhinovska dhe Dekani i Fakultetit të Teknologjisë dhe Metalurgjisë Prof. Dr. Igor Jordanov.
Bashkëpunimi me Fakultetin e Teknologjisë dhe Metalurgjisë është i një rëndësie të veçantë në kontekstin e sektorit minerar dhe menaxhimit të lëndëve të para minerale, duke pasur parasysh ekspertizën, kapacitetin kërkimor dhe rolin afatgjatë të Fakultetit në edukimin e stafit profesional dhe zhvillimin e zgjidhjeve të aplikuara në fushën e metalurgjisë, materialeve dhe proceseve industriale.
‘Minierat nuk duhet të udhëhiqen në mënyrë të improvizuar. Vendimet duhet të bazohen në
shkencë, ekspertizë dhe të dhëna. Bashkëpunimi me Fakultetin e Teknologjisë dhe Metalurgjisë na lejon një lidhje të drejtpërdrejtë midis institucioneve dhe njohurive që po krijohen në komunitetin akademik – njohuri që janë të nevojshme për menaxhimin e përgjegjshëm të lëndëve të para minerale dhe për zhvillimin afatgjatë të sektorit’, theksoi ministrja Bozhinovska.
Memorandumi parashikon bashkëpunim përmes projekteve të përbashkëta studentore dhe
aplikuese, mbështetje ekspertësh dhe shkencore, organizimin e trajnimeve, punëtorive dhe
konferencave, formimin e ekipeve të ekspertëve, si dhe shkëmbimin e njohurive dhe përvojave të rëndësishme për menaxhimin modern, të përgjegjshëm dhe të qëndrueshëm të burimeve minerare. Theks i veçantë do t’i kushtohet mundësisë që studentët dhe ekspertët e ardhshëm të njihen nga afër me punën e ministrisë përmes mësimdhënies praktike.
Ministria e njeh akademinë si një partner thelbësor në avancimin e cilësisë së politikave publike, veçanërisht në sektorë të ndjeshëm dhe strategjikë si minierat dhe burimet minerale, ku vendimet duhet të bazohen në shkencë, të dhëna dhe analiza ekspertësh.
Nënshkrimi i këtij memorandumi është pjesë e strategjisë më të gjerë të Ministrisë për lidhjet institucionale me arsimin e lartë dhe institucionet shkencore. Deri më tani, Ministria ka nënshkruar memorandume bashkëpunimi me Fakultetin e Inxhinierisë Mekanike, Fakultetin e Inxhinierisë Elektrike dhe Teknologjive të Informacionit (FEIT), si dhe me fakultetet brenda Universitetit ‘Goce Dellçev’ – Shtip, me qëllim krijimin e një rrjeti njohurish, ekspertize dhe mbështetjeje për zhvillimin e sektorit.
Me këtë, Ministria dërgon një mesazh të qartë se reforma, zhvillimi dhe stabiliteti në energji dhe miniera ndërtohen mbi partneritetin, njohuritë dhe përgjegjësinë institucionale.
