Kandidati i VLEN-it për kryetar të Tetovës dhe njëri nga liderët e VLEN-it, Bilall Kasami, bashkë me kandidatët për këshilltarë komunalë, në krye me bartësin Albi Qamili, rininë dhe aktivistet, marshuan sot drejt Banjës së Tetovës.
Në një postim në rrjetet sociale, Kasami thotë se pikërisht ky lokacion është simboli i qartë i dy epokave të Tetovës.
“Banja e Tetovës sot është një ndër simbolet që i dallon qartë dy epokat e Tetovës, epokën e kaosit, neglizhencës dhe papërgjegjësisë dhe epokën e punës, kujdesit, pastërtisë, të cilën e filluam në vitin 2021. Banjën e gjetëm të lënë pas dore, me rrugën e shkatërruar dhe murin që rrezikonte kalimtarët për çdo ditë. E rregulluam dhe zbukuram murin, ndërtuam park lojërash për fëmijë, bëmë zhveshtore të reja për vizitorët e Banjës. E gjithë rrethina mbahet pastër si asnjëherë më parë”, thotë Kasami.
Sipas tij, Tetova e ka vendosur që të mos kthehet prapa, por t’i japë vazhdimësi zhvillimit.
“Tetova meriton një udhëheqësi që e do të bukurën, e do punën, e do zhvillimin. Tetova nuk kthehet prapa në epokën e zymtë, Tetova s’ndalet!”, shkruan Kasami.
