Bexheti: Njofton për hapjen e thirrjes së parë për IPARD III
Zëvendësministri i Bujqësisë, Flakron Bexheti, në shoqërim të zëvendësdrejtorit të Agjencisë për Mbështetje Financiare në Bujqësi dhe Zhvillim Rural, Mevlan Morina, kanë hapur Ditën Informuese për Thirrjen Publike të Masës 1 në kuadër të Programit IPARD III 2021-2027.
“Ky program ofron mundësi financimi për bujqit dhe ndërmarrjet e sektorit bujqësor, duke sjellë një mbështetje financiare prej 7.4 milionë eurosh për investime në mjetet themelore të ekonomive bujqësore. Programi ka për qëllim të ndihmojë fermerët individualë, kooperativat dhe ndërmarrjet mikro, të vogla dhe të mesme që të investojnë në modernizimin e kapaciteteve të tyre prodhuese”, ka bërë të ditur Bexheti.
Zëvëndësministri Bexheti ka shtuar se mbështetja financiare mund të shfrytëzohet për sektorët si prodhimi bimor dhe blegtoral, peshkimi, përpunimi dhe marketingu i produkteve bujqësore, si dhe prodhimi i energjisë nga burime të rinovueshme për konsum vetjak.
“Afati i aplikimit është deri më 29 mars 2025, dhe përfituesit e mundshëm janë inkurajuar të shfrytëzojnë këtë mundësi për zhvillimin dhe modernizimin e ekonomive të tyre bujqësore”, ka nënvizuar zëvendësministri Bexheti.
https://www.facebook.com/share/v/15MkswgEdQ/
