Kreu i Partisë Demokratike, Sali Berisha, në fjalimin e mbajtur para Kryeministrisë, i bëri thirrje qytetarëve që më 24 janar të bashkohen në një protestë të madhe, të cilën e cilësoi si një moment vendimtar për krijimin e një fronti të vërtetë opozitar.
Berisha u shpreh se viti 2026 do të jetë “viti i përmbysjes së diktaturave” dhe se populli shqiptar duhet të tregojë fuqinë e bashkimit dhe guximit për të sjellë ndryshimin.
Në fjalën e tij, ai tha se kreu i qeverisë po i poshtëron përditë shqiptarët duke u nxjerrë përpara zëvendës kryeministren e pandehur, Belinda Balluku, të cilën e cilësoi si “maskën e tij”. Kryedemokrati u shpreh se mesazhi më 24 janar duhet të jetë i qartë: të heqë dorë nga grushti i shtetit, referuar mbrojtjes që po i bën Rama Ballukut.
“Të dashur miq, opozita shqiptare ka vendosur të thërrasë një protestë me datën 24 janar, në të cilën të japim mesazhet e qarta, përfundimtare. Ndaj dhe me 24, të gjithë në këtë shesh për të treguar fuqinë e bashkimit të shqiptarëve, fuqinë e guximit të shqiptarëve, vizionin e tyre, shpirtin e pamposhtur të popullit opozitar,” tha Berisha.
Ai ftoi qytetarët të bisedojnë me njëri-tjetrin, pavarësisht bindjeve politike, dhe të dalin nga konformizmi për të ndërtuar një front të gjerë opozitar.
“Këto ditë që na ndajnë janë jetike që secili prej nesh të ulet, të bisedojë me çdo qytetar, pavarësisht nga bindjet e tij politike. Të bashkohemi, të bisedojmë me çdo intelektual, të dalë nga konformizmi, sepse konformizmi është sëmundja më e tmerrshme e një intelektuali,” u shpreh ai.
Berisha i bëri thirrje të rinjve të ngrihen në lartësinë e idealeve të tyre dhe të marrin pjesë në protestë.
“Gjenerata e tyre është gjenerata e misioneve të mëdha. Ndaj ftoj çdo të ri të këtij vendi të ngrihet në lartësinë e idealeve të tij dhe me guximin, energjinë të bëjë çdo gjë për largimin e këtij regjimi armiqësor ndaj shqiptarëve,” tha ai.
Berisha e përshkroi protestën e 24 janarit si një akt shprese dhe fitorjeje, duke e krahasuar me lëvizjet opozitare në vende të tjera.
“Asgjë nuk mund të ndalë një popull të vendosur për të mbrojtur idealet e tij të lirisë. Dhe ne vijmë sepse besojmë në idealet tona të drejta, dhe se besojmë se këto ideale do triumfojnë së shpejti,” u shpreh kreu i PD-së.
