Kryetari i Komunës së Haraçinës, Daut Beqiri, ka njoftuar se komuna ka nisur pastrimin dhe rregullimin e një hapësire publike që për një kohë të gjatë ka qenë e lënë pas dore, ku shumë shpejt pritet të ndërtohet Parku i Haraçinës.
Në një postim në Facebook, Beqiri theksoi se komuna po vazhdon me rregullimin dhe mirëmbajtjen e hapësirave publike në shërbim të qytetarëve. “Sot kemi filluar me pastrimin dhe rregullimin e kësaj hapësire publike, e cila për një kohë të gjatë ka qenë e lënë pas dore. Shumë shpejt këtu do të kemi Parkun e Haraçinës”, ka shkruar Beqiri.
Ai kujtoi se një nga zotimet gjatë fushatës ka qenë kujdesi dhe mbrojtja e hapësirave publike, duke theksuar se ato duhet të jenë në shërbim të qytetarëve dhe të shfrytëzohen për projekte që i nevojiten komunitetit. “Hapësirat që i takojnë shtetit duhet të jenë në shërbim të qytetarëve dhe të shfrytëzohen për projekte si parqe, sheshe dhe hapësira rekreative”, ka theksuar ai.
Sipas Beqirit, Haraçina po ndryshon gradualisht, ndërsa institucionet lokale po punojnë për krijimin e hapësirave të rregulluara, të gjelbra dhe funksionale për të gjithë qytetarët.
