Nën dritat e Kullës Eiffel që shkëlqente, Drejtori Kreativ i Saint Laurent, Anthony Vaccarello, solli një koleksion të veçantë në Javën e Modës në Paris. Një sfilatë e mbushur me fustane voluminoze dhe veshje ku dominonte lëkura.
Publiku u ul mes një kopshti të rregulluar me lule të bardha, të cilat formonin logon gjigante të YSL – një sfond magjishëm për një koleksion që do të mbahet mend gjatë në botën e modës.
Sfilata u hap me veshje si xhaketa lëkure të fryra, të zeza, të shoqëruara me këmisha të bardha dhe funde të prera. Më pas, në pasarelë u shfaqën pardesy të holla, të mbledhura në bel, që kombinoheshin perfekt me vathë, syze të mëdha dhe taka klasike.
Në pasarelë u prezantuan gjithashtu modele me fustane voluminoze, me pala të krijuara nga një material i lehtë.
Kjo sfilatë shënoi edhe një rikthim të shumëpritur. Modelja e njohur, Bella Hadid, sfiloi në pasarelë vetëm pak javë pasi ndau me ndjekësit në Instagram detaje rreth trajtimit intensiv që po merrte për sëmundjen e Lyme.
Java e Modës në Paris, ku marrin pjesë emra të mëdhenj si Dior, Chanel dhe Hermès, do të vazhdojë deri më 7 tetor, duke premtuar stil, elegancë dhe emocione.
