Kandidati i VLEN për komunën e Gostivarit, Nevzat Bejta në emisionin “ZOOM” në TVM2 ka thënë se sapo të zgjidhet në krye të komunës do të bëjë publike një nga skandalet më të mëdha të Arben Taravarit.
Ai ka shpalosur një dokument të nënshkruar nga u.d. Valbon Limani, për kontratat që janë lidhur për 8 vitet e kaluara për aktivistë të partisë të cilët kanë marrë rroga duke ndenjur në shtëpi.
“Unë do të jem i zgjedhur më 11 janar dhe atëherë do të dalin të gjitha keqpërdorimet që kanë bërë në komunë dhe si e kanë vjedhur buxhetin e komunës së Gostivarit. Besoj që qeverisja e Arben Taravarit me vazhdimin e punës nga nxënësi i tij, Valbon Limani do të jetë një prej skandaleve më të mëdha jo vetëm në vend, por edhe në Ballkan”, ka thënë Bejta.
Taravari ka thënë fjalë të rënda për Ahmetin
Bejta u është kundërpërgjigjur akuzave të fundit që Arben Taravarit drejtoi në adresë të tij.
“Ai nuk është në vete çka thotë, ju kujtohet çka ka thënë për Ali Ahmetin, ka thënë shumë fjalë të rënda dhe tani ri me Ali Ahmetin. Ai është një matrapaz, bën akrobacione, person që di të ofendojë, i njohur si një mashtrues i madh dhe ka ngelur në skenën politike duke u marrë me mashtrime”, është përgjigjur Bejta.
