Bashkimi Demokratik për Integrim (BDI) ka reaguar ndaj Raportit të Komisionit Evropian për Maqedoninë e Veriut për vitin 2025, duke e cilësuar atë si dokumentin më kritik ndër vite dhe si dëshmi të qartë të regresit të vendit në procesin e integrimit evropian.
Në kumtesën e BDI-së thuhet se raporti konstaton mungesë përparimi në sundimin e ligjit dhe në luftën kundër korrupsionit, duke theksuar se korrupsioni i nivelit të lartë mbetet i pandëshkuar dhe se ndikimi politik në gjyqësor vazhdon të jetë i pranishëm. Po ashtu, Komisioni Evropian vëren se institucione kyçe janë të paralizuara, zyrtarë publikë ndërhyjnë në organet e pavarura, ndërsa reformat në drejtësi kanë mbetur vetëm në letër.
Sipas BDI-së, një nga mesazhet më shqetësuese të raportit është se procesi i integrimit evropian është bllokuar nga vetë qeveria aktuale, e cila nuk ka ndërmarrë asnjë hap për ndryshimet kushtetuese të dakorduara me Bashkimin Evropian. Për pasojë, vendi nuk ka hapur asnjë kapitull negociatash dhe nuk ka bërë asnjë përparim drejt anëtarësimit.
Raporti, sipas kumtesës, ngre alarme edhe për rënie të standardeve demokratike, polarizim ekstrem politik, presion mbi mediat, mungesë të mbrojtjes së gazetarëve, dobësim të luftës kundër korrupsionit dhe ngecje në mbrojtjen e të drejtave të qytetarëve.
BDI thekson se raporti përbën “dëshminë zyrtare të dështimit të qeverisë aktuale”, e cila – siç thuhet – me paaftësinë dhe mungesën e vizionit ka humbur mbështetjen e partnerëve ndërkombëtarë dhe ka kthyer vendin pas në procesin euro-atlantik.
Partia kujton se ishte pikërisht BDI ajo që e çoi vendin drejt anëtarësimit në NATO dhe që hapi negociatat me Bashkimin Evropian. “Ne do të ndërmarrim çdo hap institucional për të liruar procesin integrues nga bllokada e sotme dhe për t’i kthyer vendit orientimin e qartë evropian,” thuhet në reagim.
Në fund, BDI kritikon deklaratat e Kryeministrit Mickoski, duke i cilësuar si patetike dhe duke theksuar se çdo vonesë në rrugën evropiane është humbje për shtetin dhe qytetarët.
