Udhëheqësit e Bashkimit Evropian janë zotuar për një kredi prej 90 miliardë eurosh për Ukrainën, për të mbuluar nevojat urgjente financiare, por nuk arritën marrëveshje që kjo kredi të garantohet drejtpërdrejt me asetet ruse të ngrira në BE.
Pas përfundimit të bisedimeve në orët e hershme të së premtes, presidenti i Këshillit Evropian, Antonio Costa, deklaroi se BE-ja ka miratuar një kredi dyvjeçare prej 90 miliardë eurosh, e mbështetur nga buxheti i unionit, e cila do të shlyhet nga Ukraina vetëm pasi Rusia të paguajë reparacionet e luftës, shkruan TheGuardian.
Sipas The Guardian, ai shtoi se BE-ja rezervon të drejtën të përdorë asetet ruse të ngrira për shlyerjen e kësaj kredie. Shumë shtete anëtare kishin kërkuar që kredia të garantohej drejtpërdrejt me rreth 210 miliardë euro asete ruse të ngrira në Evropë, por plani u kundërshtua nga
Belgjika, e cila strehon 88 për qind të këtyre fondeve, për shkak të rrezikut ligjor dhe kërkesës për garanci të pakufizuara buxhetore nga shtetet e tjera anëtare.
Kancelari gjerman Friedrich Merz e cilësoi marrëveshjen si një mesazh të fortë ndaj Rusisë, duke theksuar se nëse Moska nuk paguan reparacione, BE-ja do të përdorë asetet e ngrira ruse në përputhje me të drejtën ndërkombëtare. Ndërkohë, Belgjika e ka cilësuar idenë e kredisë së bazuar në reparacione si problematike dhe me shumë paqartësi.
Marrëveshja u bë e mundur pasi Hungaria, Sllovakia dhe Çekia pranuan përdorimin e buxhetit të BE-së për financimin e Ukrainës, me kusht që të mos kenë detyrime financiare shtesë. Teksti përfundimtar garanton se kjo kredi nuk do të ndikojë në obligimet e tyre buxhetore.
BE-ja ka bërë thirrje gjithashtu aleatëve jashtë bashkimit të kontribuojnë rreth 45 miliardë euro për të mbuluar nevojat financiare të Ukrainës për vitet 2026–2027, të vlerësuara në 136 miliardë euro.
Presidenti ukrainas Volodymyr Zelensky e përshëndeti vendimin, duke paralajmëruar se pa mbështetje financiare Ukraina rrezikon të mbetet pa fonde për prodhimin e dronëve, një element kyç në mbrojtjen kundër agresionit rus.
