Në një atmosferë të zjarrtë dhe me emocion të lartë, tifozët e flaktë të Shkëndijës – Ballistët – edhe njëherë treguan se janë shumë më tepër se thjesht një grup mbështetësish. Ata u bënë mishërimi i mesazhit të qartë të dërguar më herët nga filantropi dhe mbështetësi i klubit, z. Lazim Destani, i cili bëri thirrje për një tifozëri dinjitoze, të përmbajtur dhe pa gjuhë ofenduese.
Thirrja e tij u dëgjua qartë dhe u respektua me përgjegjësi nga Ballistët, të cilët gjatë gjithë ndeshjes dhuruan një atmosferë të jashtëzakonshme, duke kënduar këngë motivuese dhe duke mbështetur ekipin pa asnjë moment fyerjeje.
“Ne jemi lojtari i 12-të, por edhe pasqyra e vlerave që duam të përfaqësojmë si klub dhe si komunitet,” është dëgjuar të thuhet nga vetë anëtarët e grupit, të cilët me këtë qëndrim fituan jo vetëm respektin e opinionit sportiv, por edhe të kundërshtarëve.
Kjo mbrëmje ishte një dëshmi e qartë se pasioni për futbollin dhe respekti për vlerat mund të ecin krah për krah. Klubi Shkëndija, njëherësh simbol krenarie për shqiptarët, u përfaqësua denjësisht edhe nga tribuna – aty ku Ballistët treguan se janë një forcë që frymëzon.
Një fitore jo vetëm në fushë, por edhe në kulturën sportive!
