Shtabi Qendror i koalicionit VLEN dhe Shtabi Komunal i VLEN-it në Strugë kanë konfirmuar edhe njëherë se në zgjedhjet lokale të 19 tetorit do të mbështesin vetëm kandidatin e pavarur, Mendi Qyra.
Në një reagim publik, shefi i shtabit zgjedhor të VLEN-it, Adnan Azizi, ka theksuar se partitë e opozitës në Strugë dhe bashkëpunëtorët e tyre “me kandidatura të pavarura” po zhvillojnë një fushatë joetike dhe me shpifje.
“Kjo tregon se koalicioni i Zullumit e ka dorëzuar Strugën që tani dhe mundohet me shpifje të fitojë ndonjë votë më tepër”, ka deklaruar Azizi.
Ai ka hedhur poshtë të gjitha pretendimet se VLEN ose ndonjëra nga partitë e saj mbështet kandidatë të tjerë. Sipas tij, Lëvizja BESA, Lëvizja Demokratike, Alternativa dhe Aleanca për Shqiptarët që janë pjesë e VLEN-it, janë të unifikuara në mbështetjen ndaj Qyrës. “Çdo informatë tjetër vjen nga strukturat e opozitës dhe synon të shpërndajë habi e mjegull tek qytetarët”, ka shtuar Azizi.
