Deputeti i koalicionit VLEN, Adnan Azizi, ka reaguar pas votimit të Ligjit për Safe City në Kuvend, duke akuzuar opozitën për ndryshim qëndrimi dhe humbje të ndikimit politik.
Sipas Azizit, koalicioni opozitar AKI ishte i gatshëm ta votonte Ligjin për “Safe City”, nëse votimi do të varej nga votat e tyre, gjë që sipas tij është dëshmuar nga deklaratat e deputetëve të BDI-së dhe qëndrimi i Ali Ahmetit pas takimit të liderëve.
“Sot u pa realiteti politik. AKI e humbi edhe Badenterin dhe e kuptoi se nuk ka më peshë politike as në numra në Kuvend, ashtu siç e humbi edhe peshën elektorale në zgjedhjet lokale”, ka theksuar Azizi.
Ai gjithashtu shkruan se Avokati i Popullit u votua me mekanizmin e Badenterit edhe pa votat e AKI-së, duke e cilësuar këtë si dëshmi të defaktorizimit të opozitës.
Në reagimin e tij, Azizi akuzon AKI-në se ndryshoi qëndrim për Ligjin për Safe City për të mbuluar tkurrjen politike dhe humbjen e Badenterit, duke u përpjekur, sipas tij, “të kapet në litarin populist”.
“Ky ligj mbron jetën e qytetarëve, parandalon aksidentet dhe vdekjet tragjike në rrugët tona. Këtë e di edhe AKI-ja. Këtë e thoshte edhe AKI-ja deri sot”, ka përfunduar Azizi.
