Pas një problemi me avionin, Kristjan Asllani ka mbërritur më në fund në Stamboll për t’u bashkuar me skuadrën e tij të re, Besiktas.
Klubi turk e ka konfirmuar zyrtarisht transferimin, duke publikuar foto të mesfushorit të Kombëtares shqiptare me shallin bardhezi. Më pas, Besiktas njoftoi se Asllani ka kryer me sukses të gjitha vizitat mjekësore, duke filluar nga testet kardiologjike e deri te provat nën sforcim, të cilat kanë konfirmuar një gjendje fizike absolutisht të mirë të futbollistit.
Kristjan Asllani është transferuar te Besiktas në formë huazimi deri në fund të këtij sezoni, me të drejtë blerjeje nga ana e klubit turk.
Sipas mediave në Turqi, Besiktas mund ta blejë kartonin e mesfushorit 23-vjeçar për një shifër që varion nga 12 deri në 13 milionë euro, përcjell tch.
Asllani nuk është i vetmi futbollist shqiptar pjesë e Besiktasit, pasi në këtë skuadër aktivizohet edhe Milot Rashica, ndërsa klubi bardhezi zotëron gjithashtu kartonin e Ernest Muçit, i cili është transferuar te Trabzonspor në formë huazimi.
