Arsimi marshon drejt historisë, Çegranasit mposhtin Bregallnicën dhe afrohen me Ligën e Parë!
Skuadra e Arsimit nga Çegrani vazhdon të shkruajë historinë në Ligën e Dytë të Maqedonisë së Veriut! Në ndeshjen derbi të javës së 27-të, çegranasit triumfuan me rezultat 2:1 ndaj Bregallnicës, duke bërë një hap të madh drejt ëndrrës së madhe, inkuadrimit në elitën e futbollit vendor.
Fitorja e sotme, e arritur para publikut vendas, jo vetëm që e ngjiti Arsimin në pozitën e dytë të tabelës, por njëkohësisht largoi nga gara rivalin direkt Bregallnica, që tani mbetet gjashtë pikë prapa. Me këtë rezultat, Arsimi është një ndër favoritët kryesorë për ngjitjen direkte, krahas liderit aktual, Makedonija Gj.P., që gjithashtu regjistroi fitore ndaj Borecit (3:0) dhe matematikisht e dërgoi këtë të fundit në Ligën e Tretë.
Ndërkohë Bashkimi, një tjetër pretendent për ngjitje, dështoi sërish, këtë herë duke barazuar në Tetovë kundër SFC Shkupit (1:1), duke humbur terren të çmuar në garën për elitën.
Tre javë nga fundi, Arsimi ka fatin në duart e veta dhe ëndrra për të parë Çegranin në Ligën e Parë nuk ka qenë kurrë më pranë!
