Sulmuesi i Arsenalit, Kai Havertz, rrezikon që të humbasë pjesën tjetër të sezonit për shkak të një tërheqjeje muskulore në pjesën e pasme të kofshës.
Ky përbën një tjetër problem për trajnerin Mikel Arteta, i cili ka pasur vështirësi për shkak të mungesave në repartin ofensiv. Lojtari 25 vjeçar e pësoi lëndimin në Dubai, ku topçinjtë ishin për t’u stërvitur nisur nga klima e mirë.
Por analizat më të detajuara do të përcaktojnë nëse gjermani do të ketë nevojë për një ndërhyrje kirurgjikale.
Havertz është golashënuesi më i mirë i Arsenalit me 15 gola të shënuar në të gjitha kompeticionet. Përveç gjermanit të dëmtuar tek Arsenali janë edhe sulmuesit Gabriel Jesus, Bukayo Saka dhe Gabriel Martinelli.
Tashmë opsionet e teknikut Arteta për ofensivën janë Leandro Trossard, Raheem Sterling dhe lojtarin e marrë nga akademia Ethan Nwaneri. Dëmtimet e Martinelli dhe Havertz ndodhën pas rreth dy javësh nga mbyllja e merkatos së dimrit, me “topçinjtë” që vendosën të mos bënin asnjë afrim.
Arsenali është jashtë garës për dy kupa vendase, garës në FA Cup dhe Carabao Cup, por gjendet në vend të dytë në Premier League gjashtë pikë larg Liverpool-it kryesues dhe i kualifikuar në të 16-at e Ligës së Kampioneve.
