Përballja e Ligës së Kampionëve mes Interit dhe Arsenalit ka mjaftuar që vlerësimet e “Topçinjve” për Pio Espositon të rriten ndjeshëm. Sulmuesi italian hyri nga stoli dhe, edhe pse Interi u mposht 3-1, ndikimi i tij në lojë ishte i menjëhershëm, duke i dhënë ekipit italian më shumë peshë në fazën ofensive dhe duke krijuar shpresë për një rikthim që në fund nuk u realizua, shpesh për çështje centimetrash.
Sipas Corriere dello Sport, paraqitja e Espositos ka ndezur rrjetet sociale të tifozëve të Arsenalit dhe ka bindur drejtuesit londinezë ta fusin profilin e tij në listën e dëshirave për tregun e transferimeve. Intensiteti, forca fizike dhe cilësitë teknike të një “numri 9” klasik bënë që Interi të dukej më i rrezikshëm, madje detyruan edhe Artetën të ndërhyjë taktikisht në mbrojtje për ta kontrolluar më mirë.
Megjithatë, qëndrimi i Interit është i qartë. Klubi zikaltër e konsideron Espositon një perlë për të ardhmen dhe nuk ka asnjë qëllim të dëgjojë oferta. Interi beson se sulmuesi i vitit 2005 ka ende shumë për t’u rritur dhe për t’u rafinuar, ndaj për momentin ai është i shpallur i patransferueshëm, pavarësisht interesimit në rritje nga Anglia dhe Evropa.
