Policia ka arrestuar pronarin 58-vjeçar të një klubi nate në Kumanovë, pasi brenda objektit të tij janë gjetur mjete piroteknike.
Sipas njoftimit të Ministrisë së Punëve të Brendshme, gjatë një kontrolli të zhvilluar në kuadër të aksioneve për mbikëqyrjen e klubeve të natës dhe kabareve, forcat policore të Sektorit për Punë të Brendshme (SVR) Kumanovë kanë kapur në flagrancë personin me inicialet T.V (58), teksa transportonte pajisje kundër zjarrit nga vetura e tij drejt klubit.
Më pas, policia ka ushtruar kontroll brenda lokalit dhe ka zbuluar mjete piroteknike, të cilat janë sekuestruar menjëherë.
Pronari i klubit është shoqëruar në stacionin policor, ku në prani të një avokati është marrë në pyetje. Inspektorët e mbrojtjes dhe shpëtimit kanë lëshuar gjoba administrative dhe kanë urdhëruar pezullimin e aktivitetit të klubit deri në eliminimin e shkeljeve të konstatuara. Për rastin është informuar edhe prokurori publik.
Organet e rendit vazhdojnë aksionet për kontrollin e lokaleve të natës, me qëllim rritjen e sigurisë dhe parandalimin e aktiviteteve të paligjshme.(INA)
